Gebed vir die kinders van Suid-Afrika - Anriëtte de Ridder

Here, ons bid vir die kinders van Suid-Afrika.
Ons staan in die skoene van kinders
- wat siek is – mag ons hulle versorg;
- wat honger is – mag ons hulle voed;

- wat arm is – mag ons meer vrygewig wees;
- wat anders lyk – mag ons hulle aanvaar soos hulle is;
- wat nie geleenthede ontvang nie – mag ons ongeregtigheid regstel;
- wat bang is – mag ons hulle beskerm;
- wat hartseer voel – mag ons hulle troos;
- wat eensaam is – mag ons hulle vriende raak;
- wat nie ouers het nie – mag ons hulle familie wees;
- wat nie in hulleself glo nie – mag ons hulle grootste ondersteuners wees;
- wat dink hulle het nie ‘n stem nie – mag ons regtig na hulle luister;
- wat hopeloos voel – mag ons hulle raaksien!
Here, mag ons elke kind se drome aanmoedig, en elkeen die vryheid gee om te groei.
Mag hulle idees en kreatiwiteit ons inspireer om die wêreld ‘n beter plek te maak.
Mag ons kinders se geloof en wysheid erken en by hulle leer.
En Here, help ons om elke kind te omarm met Jesus se liefde.
Amen

[Aangestuur deur Christelle Hattingh]

Vakante Kindersorgposisie

My gedagtes: Waardeer dit wat jou kinders doen

William James sê op ‘n stadium dat : “The deepest principle in human nature is the craving to be appreciated.”

Hierdie is so ‘n basiese beginsel, maar hoe dikwels en maklik vergeet ons dit. Dit is baie moeilik en selfs onmoontlik om ‘n slegte verhouding te hê met iemand wat jou gereeld en opreg komplimenteer. Dit is ook een van die mees basiese behoeftes van ons kinders (al tree hulle so onafhanklik op.)

As hulle nie respek en waardering kry by ons as ouers nie, sal hulle dit op ander plekke soek, plekke wat gewoonlik nie baie gesond is nie. (Lees die koerante en luister nuus - dis só hartseer en tragies.) Dit is ongelukkig so dat “People are born to be a success, but conditioned to be a failure.” 

As kinders te veel hoor dat hulle stout en dom en ongehoorsaam is, begin hulle dit glo. En dan tree hulle ook so op om aan die uitsprake te "voldoen." ‘n Ouer is die grootse bron van kondisionering in kinders se lewens. Kom ons gebruik hierdie posisie met groot sorg en verantwoordelikheid. Waardering bou selfvertroue.

Koester eerder elke fase en die alledaagse vreugdes. En sê elke dag dankie vir jou hartsmense, hulle het dit nodig om te hoor.

My liewe kind

Solank jy in hierdie huis bly, sal jy die reëls gehoorsaam.

Wanneer jy jou eie huis het, kan jy jou eie reëls maak.

In hierdie huis het ons nie 'n demokrasie nie.

Ek het nie 'n verkiesingsveldtog gehou om jou ouer te wees nie.

Jy het nie vir my gestem nie.

Ons is ouer en kind deur die genade van God,

en ek aanvaar die voorreg en ongelooflike verantwoordelikheid.

In aanvaarding hiervan het ek die plig om

die rol van 'n ouer te vervul.

Ek is nie jou pel nie.

Ons ouderdomme verskil te veel.

Ons kan baie dinge deel, maar ons is nie pelle nie.

Ek is jou ouer.

Dit is 100 keer meer as wat 'n pel is.

Ek is ook jou vriend, maar ons is op totaal verskillende vlakke.

Jy sal in hierdie huis doen soos ek sê, en hoewel jy vrae

mag vra, mag jy nie my gesag bevraagteken nie.

Onthou asseblief dat wat ek jou ook al vra om te doen,

deur liefde gemotiveer is.

Dit sal vir jou moeilik wees om te verstaan

totdat jy eendag 'n kind van jou eie het.

Tot dan, vertrou my. 

Gebed vir my kind

Liewe Vader, as my kind gaan slim wees, gee ons die genade om dankbaar te wees, sonder om te spog.

Want wie is ons, liewe Heer, om ons kind se talente te adverteer asof ons self met die uitdeling daarvan te make gehad het?

En as hy nie slim is nie en hy doen sy bes sonder sukses, wil U ons ook daarmee tevrede maak.

Want wie is ons dat ons kindjie die uitverkorene aan die toppunt van die klas moet wees?

As U hom eendag 'n groot man wil maak, Here, wil U hom nie so belangrik laat voel dat hy in die lig van 'n ander sal wil staan nie. 

En Vader, as U vir my kindjie 'n klein, nietige plekkie in die lewe

voorberei het, laat hom met waardigheid ook sy nederige taak vervul. Want ook in hom het U Uself verheerlik deur hom na U beeld te skape.

Mag geen voetpad vir hom so

moeiteloos kronkel dat hy nie

deur sy fout kan leer nie;

en geen berg so steil dat hy U

nie eendag op die top daarvan

sal kan vind nie.

Aan elke kind ...

Wanneer jou ouers eendag sterf,
mag jy dalk huil.
Jou ouers gaan nie weet nie,
so huil nou oor jou ouers.

Jy gaan blomme na jou ouers se graf neem,
maar jou ouers gaan dit nie sien nie.
Maak nou tyd vir jou ouers.
Daar is geen verskoning van tyd nie.

Jy gaan op jou ouers se begrafnis mooi woordjies praat,
jou ouers gaan dit nie hoor nie.
Sê dit nou vir jou ouers .

Jy gaan jou ouers se foute vergeet,
maar jou ouers gaan nie daarvan weet.
Vergewe jou ouers nou.

Jy gaan jou ouers mis,
maar jou ouers gaan dit nie weet nie.
Mis jou ouers nou

Jy gaan wens jy't meer tyd saam met ouers spandeer,

spandeer dit nou.

[Dankie, Anoniem]

Moedersdag: Wat kan ons daaruit leer?

Ma's, regte moeders het moederharte waardeur hulle deur die lewe moet gaan, hulle moet sensitief wees, hulle moet weet wanneer om stil te bly en wanneer om te praat, wanneer om 'n drukkie uit te deel en wanneer om iemand aan te spreek. Daar is soveel gebroke en gekweste siele wat 'n ma se pad kruis, dat as sy daardie mens met haar moederhart omarm, sy baie meer as 'n sielkundige kan vermag. 

Die westerling en ons jong geslag is behep met sukses, prestasie en materiële sukses, en is nie daarop ingestel om die behoeftes van ander mense raak te sien nie. En dis net hier waar jy as jongeling 'n gesprek met jouself moet hê. As jy in 'n huis grootgeword het waar omgee en moederliefde nie deel van julle gesinspakket is nie, hoef jy nie so te wees nie. Jy moet en jy kan 'n beter ma vir jou kinders wees as wat jou ma vir jou was. Jy het geleer uit haar foute, jou foute en ook jou verlange na 'n omgeema.

God is die bron van liefde en omgee. En as jy Hom nie ken nie, kan jy nie 'n liefdevolle ma wees nie. Die Here is geduldig, Hy is lief vir elkeen en Hy dra jou belange op die hart, maar jy moet Hom ook in jou lewe toelaat en volgens Sy wil leef. 

Here, vandag bid ons vir alle moeders, ma’s, oumas, instaanma's en moederfigure wat die verantwoordelike taak het om kinders op die regte pad te hou. Dankie vir die liefde, omgee en uitreik wat so deel is van hulle daaglikse bestaan. Seën hulle en maak ons dankbare kinders wat die waarde van ons ma's besef. Leer ons om gehoorsaam te lewe. Amen.

'n Kind leer dit waarmee hy saamleef

As 'n kind met kritiek saamleef, leer dit hom om te veroordeel.

As 'n kind met vyandigheid saamleef, leer dit hom om te baklei.
As 'n kind met bespotting saamleef, leer dit hom om skugter te wees.
As 'n kind met skaamte saamleef, leer dit hom om skuldig te voel.
As 'n kind met verdraagsaamheid saamleef, leer dit hom om geduldig te wees.
As 'n kind met bemoediging saamleef, leer dit hom om vertroue in homself te hê.
As 'n kind met prys saamleef, leer dit hom om te waardeer.
As 'n kind met billikheid saamleef, leer dit hom om regverdig te wees.
As 'n kind met sekuriteit saamleef, leer dit hom om geloof te hê.
As 'n kind met goedkeuring saamleef, leer dit hom om van homself te hou.
As 'n kind met aanvaarding en vriendskap saamleef, leer dit hom om liefde in die wêreld om hom raak te sien!

Ouers: Voordele van speel

Gewone speletjies is die sleutel tot gelukkige, gesonde, vaardige en goed aangepaste kinders. - Anys Rossouw, opvoedkundige sielkundige (Rooi Rose, 23-11-2019)

Bevorder jou kind se fisieke gesondheid en fiksheid. Dink terug aan al die speletjies wat jy as kind gespeel het en leer dit vir jou kinders. Deesdae wil kinders net op hulle selfone of voor die TV wees. Lekker hardloopspeletjies (met of sonder 'n bal) is nie net goeie oefening nie, dit verbeter ook onder andere die volgende:

• Groot- en fynmotoriese ontwikkeling
• Bou verbeelding en kreatiwiteit
• Bevorder kognitiewe ontwikkeling (breinfunksie)
• Verbeter geletterdheid
• Help met probleemoplossing
• Help met emosionele gedrag
• Ontwikkel selfvertroue en selfbeeld
• Help om sosiale vaardighede te ontwikkel en te verbeter
• Verlig stres en angstigheid

Hier is 'n paar voorstelle van speletjies. Vra vir oupa en ouma hulp as julle vasbrand. Stuur gerus nog voorbeelde in.

• Aartappelresies
• Blikaspaai
• Blindemol
• Driebeenresies
• Handjietennis
• Telefoontjie
• Toutrek
• Vroteier
• Wegkruipertjie
• Wolf, wolf, hoe laat is dit?

Ouers: Alle kinders kan 'n vyfsterkind wees

Baie ouers wil graag weet wat die drie belangrikste dinge is wat enige ouer vir sy of haar kind kan leer? Hierdie drie dinge het niks met geld, rykdom of aansien te doen nie. Kinders met hierdie drie skaars eienskappe, sal uitstaan tussen die middelmatigheid van die ander wat tans die botoon voer. 

1. Respek
2. Dankbaarheid
3. Eerlikheid  

• Leer jou kind om almal wat sy of haar pad kruis met respek te behandel.
• Leer jou kind om dankbaar te wees vir dit wat hulle het - daar is altyd mense wat minder het. Materiële besittings maak nie van jou 'n beter mens nie. Die innerlike is baie belangriker as die uiterlike. 'n Baie moeilike maar waardevolle eienskap om vir jou kind te leer.
• Wees altyd eerlik. (Hierdie is die moeilikste, maar ook die waardevolste eienskap wat jou kind kan besit - hulle sal baie meer as een keer sy of haar man moet kan staan om hulle eerlikheid te bewys.)   

Hierdie drie eienskappe maak van jou kind 'n wenner. Maak van jou kind 'n kampioen as jy as ouer vir hom kan leer om uit sy foute te leer en om nooit op te gee nie. 

15 van die waardevolste lesse om jou kinders te leer ...

(Deel met elke ouer en elke tiener ...)

1. Dit is okay om nie die beste in alles te wees nie. ‘n Gelukkige tweede plek is soveel meer werd as ‘n gedrukte eerste plek.

2. Jy hoef nie al in graad een te weet wat jy na skool wil doen nie. Jou belangstellings en dit wat jou opgewonde maak, gaan verander soos jy jouself leer ken...

3. “Vriende” is dikwels net tydelike kennisse ... Ware vriende is daardie mense wat altyd daar sal wees al sien jy hulle nie elke dag nie.

4. Almal kan nie wiskunde doen nie. Net soos almal nie kan sing nie. Vind dít waarin jy goed is EN dit wat jou gelukkig maak. Geluk is belangriker as prestasie. 'n Gelukkige kind word 'n gelukkige volwassene.

5. Die enigste ding wat vanself gebeur is jou hart wat klop. Alle ander dinge is in jou beheer ...

6. ‘n Enkele woord (hetsy gesê of selfs in ‘n WA/FB/SMS) kan jou hele lewe verander: goed óf sleg. Onthou dit altyd. Jy is verantwoordelik vir die woorde wat uit jou mond kom.

7. Hoe jy nóú lyk is nie hoe jy altyd gaan lyk nie.

8. Solank jy dit ‘n droom noem, sal dit ‘n droom bly.

9. Wie jy op hierdie oomblik is, is belangriker as wie jy was en wie jy wil wees.

10. Jy het altyd keuses. Die maklike deel is om ‘n besluit te maak. Die moeilike deel is om met die uitkoms van daardie besluit saam te leef.

11. Lees die padtekens. Die maklikste pad is nie noodwendig die veiligste of die pad met die mooiste uitsig nie ...

12. Rykdom is nie die definisie van geluk nie.

13. Daar gaan altyd iemand wees wat nie van jou hou nie. Gelukkig is daardie persoon nie die enigste mens op aarde nie.

14. Almal maak foute, maar nie almal wil leer uit hulle foute nie. Wees ‘n ewige student van die lewe.

15. Respek kan nooit gekoop word nie.

Dr Owen

DIE potlood en die uitveër

POTLOOD: "Ek is jammer."

 
UIVEËR: "Waaroor? Jy't mos nie iets verkeerd gedoen nie?"

POTLOOD: "Ek is so jammer dat jy as gevolg van my seerkry! As ek 'n fout maak, is jy altyd daar om dit reg te maak! Maar nadat jy my foute laat verdwyn, verloor jy 'n deel van jouself. Jy word al hoe kleiner!"

UITVEËR" Dis waar, maar ek gee nie regtig om nie. Dis waarvoor ek gemaak is ... om jou te help wanneer jy ookal iets verkeerd doen! En selfs al sal ek eendag heeltemal opgebruik wees, is ek eindelik baie gelukkig in my werk!"

Hierdie gesprek tussen die potlood en die uitveër is op ouers en kinders van toepassing - eintlik op ons almal, afhangende van die situasie. Ouers is die uitveërs en kinders die potlode. Ouers is altyd daar vir hulle kinders! Hulle hanteer die foute en soms kry hulself, as gevolg daarvan, seer. In die proses word hulle kleiner (dis nou die ouer) en uiteindelik is hulle nie meer daar nie!

Kinders vind mettertyd iemand in hulle ouers se plek ('n lewensmaat), maar ouers is nog steeds daar vir hulle en sal altyd alles in hulle vermoë doen om die kinders se kommer of hartseer minder te maak of te laat verdwyn en ek, as potlood, kry baie seer om my ouers wat my uitveër is, onder my oë te sien wegkrimp! 

Ek besef baie goed dat ek eendag net met die uitveërkrummels en die herinnerings sal sit! Elke ouer wil net die beste vir hulle kinders hê. Hulle maak hulle van kleintyd groot met liefde en sorg, Maar as 'n ouer nie hulle kinders van God en sy beloftes leer nie, is alles verniet! Dan word die kinders net 'n leë dop en 'n maklike prooi vir die duiwel! 

Ons, as ouers, het 'n geskenk van God ontvang, wat vir ons geleen word om reg opgevoed te word! En waar kry die kinders die regte leiding? IN DIE BYBEL, by die huis met huisgodsdiens en by die voorbeeld wat die ouers stel! 

Baie kinders weet nie eens wat huisgodsdiens is nie! Maak in die aand, na ete, 'n tydjie om rustig te raak en alles af te skakel en bring weer huisgodsdiens terug in die huise in - dan sal dit beter gaan met jou en jou kinders! 

Die lewe is so deurmekaar, omdat ons God buite in die straat los! MAAK JOU HUIS OOP VIR GOD EN LEER JOU KIND VAN JESUS!

[Anoniem]

Klik HIER om die verhaal van die potlood te lees, Sedert 2018 is hierdie verhaal onder die top 5 mees gelese verhale op hierdie blog. Lekker lees!

Net nog 5 minute ekstra

Eendag gaan sit ’n dame langs ’n man op een van die bankies wat naby die speelparkie is.

“Daardie outjie is my seun,” sê sy terwyl sy na ’n klein seuntjie met ’n rooi sweetpaktop wys wat besig is om op die glyplank te speel.

“Dis ’n pragtige jong mannetjie,” antwoord die man. “Dis my dogter, die een met die wit rokkie wat daar met die fiets ry.”

Met die kyk hy op sy horlosie en roep na sy dogter. “Hoe lyk dit Melissa, dink jy nie dis tyd om huis toe te gaan nie?”

Melissa pleit by haar pa, “Pappa, kan ek nie nog asseblief vyf minute ekstra op my fiets rondry nie? Asseblief net nog vyf minute.”

Die man knik instemmend met sy kop en Melissa gaan voort om na hartelus op haar fiets rond te rits. Vyftien minute is later verby en die man staan op en roep weer na sy dogter. “Is dit nou tyd om te gaan?”

Weereens pleit Melissa, “Vyf minute, Pappa, gee net nog vyf minute meer.”

Die man glimlag en sê: “OK.”

“Mense ons, maar jy is omtrent ’n geduldige pa,” antwoord die vrou wat langs hom op die parkbankie gesit het.

Die man glimlag weer en sê, “ Haar ouer boetie, Niekie, is verlede jaar oorlede nadat ’n dronk bestuurder hom raakgery het. Hy het met sy fiets nie ver hiervandaan gery nie. Ek het nooit baie tyd saam met Niekie spandeer nie en nou sal ek enigiets gee vir net ’n ekstra vyf minute saam met hom. Ek het myself beloof om nooit dieselfde fout met Melissa te maak nie.

“Sy dink sy het vyf minute ekstra om met haar fiets rond te ry. Die waarheid is, ek kry vyf minute ekstra om haar te sien speel.”

Die hele lewe gaan oor prioriteite, wat is jou prioriteite?

Gee vir iemand vir wie jy lief is, wat vir jou omgee, wat naby aan jou bly vandag vyf minute ekstra van jou tyd, want dis nie vir hulle nie maar eintlik vir jouself. 

Loer oor die heining en vra vir jou buurvrou hoe dit met haar gaan. Glimlag vir die karwag wat in reënweer en sonskyn na jou kar kyk en knoop 'n geselsie aan omdat jy regtig belangstel. Gee 'n drukkie vir die persoon by die kliniek wat jou help - hulle werk net met probleemgevalle en sal 'n positiewe gebaar waardeer. Bak 'n koek en gaan gee dit by kindersorg af. 

Dis amper die einde van die jaar ... wat van 'n speelbederf vir kinders in 'n versorgingshuis?? 

Hoe gaan dit met jou kinders?

James Ryle het die volgende tydens 'n konferensie van die organisasie Promise Keepers vertel. Toe hy twee was, is sy pa tronk toe gestuur. Toe hy sewe was, is hy in 'n kinderhuis geplaas. Op 19 was hy in 'n motorongeluk betrokke waarin 'n vriend gesterf het. Hy het dwelms verkoop om geld vir sy regskoste bymekaar te maak, maar is gearresteer en het tronkstraf uitgedien. James het in die gevangenis tot bekering gekom.

Na sy ontslag het hy hom tot die bediening gewend. Jare later het hy sy pa opgespoor. Sy pa het gevra, 'In watter tronk was jy?' Op James se antwoord, het sy pa gesê, 'Ek het daardie gevangenis help bou.' Hy was 'n sweiser wat aan verskeie tronke gewerk het. James het gesê, 'Ek was in die tronk wat my pa help bou het' Jou kinders sal miskien nie altyd na jou raad luister nie, maar hulle kan nooit aan jou invloed ontsnap nie. 'n Kind wat sy of haar eerste 18 tot 21 jaar saam met jou slyt, sal nie anders kan nie, as om sommige van jou misstappe te herhaal, wrewelrig te wees jeens jou, maar hopenlik ook bly te wees oor jou nalatenskap.

God het oor Abraham gesê, 'Ek het hom gekies sodat hy sy seuns en hulle gesinne kan opvoed om die Here te gehoorsaam, deur te doen wat opreg en regverdig is.' Sal God dieselfde van jou kan sê? Die evangelis Filippus het die stad Samaria bekeer, maar meer nog, hy het '...vier ongetroude dogters gehad met die gawe om te profeteer' (Handelinge 21:9). Sy kinders het moreel en geestelik goed gevaar. Hoe staan sake met jou kinders?

Bron: Radiokansel

Besondere gebed van 'n moeder

'n Bruin moeder van sewe kinders sê dat sy haar kinders net deur gebed en groot genade grootgekry het. Haar naam is Maria en sy woon in Potchefstroom. Hier volg haar gebed:

"Vader van genade.

Ons staan weer vandag hier voor U as moeders wat baie bekommerd oor onse kinders se toekoms is. Ons is net die wasmasjiene, Here. 

Die Bybel is onse seeppoeier en onse gebede is die water, Here."
Die kinders is die wasgoed.

Nou as daardie klere nie skoonkom nie, Here, gebruik ons baie water.

Nou gebeur dit ook dat ons die wasgoed moet soak vir 'n lang tyd, omdat onse Vader ons partykeer nie dadelik antwoord nie.

Ons weet die Here antwoord ons op Sy eie tyd."

[Oorgeneem uit Interaksie van 2004:2]

Spesiaal, net vir jou ...

30 dagstukkies wat jy op jou eie kan deurwerk. Dankie vir diegene wat hierdie boekie aanlyn beskikbaar gestel het. Die boekie is in OneDrive gestoor. So klik op die skakel en gee kans dat dit oopmaak. Laai dan gerus die boekie af. Klik HIER!!