'n Groen strikkie-DANKIE vir HTS!

Elke Staats-hart klop groen vir Kinderbeskermingsweek

Dankie, Staats, dat julle foto's met ons deel wat geneem is tydens die groen strikkieprojek. Die projek dien as 'n sigbare simbool van hoop en verbintenis tot die skep van 'n veilige, liefdevolle omgewing waar kinders kan floreer.

Dit herinner individue dat ons saam moet staan om ons kinders teen gevare te beskerm en 'n veiliger toekoms vir elke kind te verseker. Maar die projek vra ook gemeenskappe, skole en ouers om oop gesprekke oor kinderregte en veiligheid te voer.

Kinderbeskerming gaan nie net oor fisiese mishandeling nie, maar dit herinner ons ook aan die kind wat stil swaarkry, die een wat uitgesluit voel, emosioneel seergekry het of die onsigbare kind wat daagliks tussen ons beweeg. 

Ons moet elke dag met groen harte na die kinders om ons kyk, nie net vandag nie, maar elke dag van die jaar. Dankie, Staats, dat julle met groen harte aan hierdie projek deelgeneem het.

Sterkte met julle eksamen. Ons weet sommer dat dit baie goed sal gaan.

'n Groen strikkie-uitnodiging

Donasies maak 'n tasbare verskil in die lewens van diegene in nood. Jou R5-bydrae bring hoop en 'n  blywende verandering.

Onthou altyd, jy kan 'n verskil maak. Maak nie saak hoe groot of hoe klein jou bydrae is nie, dit kan iemand se lewe fisies verander.

Dankie aan elke skool* wat deelgeneem het aan dié groen strikkie-projek - julle bydrae dien as 'n baken van hoop in die gemeenskap.

* Laerskool Eureka

* Newton Laerskool

* Laerskool Staats

* HTS Kimberley

* Hoërskool Noord-Kaap

* Adamantia Hoërskool

* TD Akademie

* Kleinkindontwikkeling & Tehilla

Daar is nog tyd om deel te neem aan hierdie groen strikkie-projek. Ons nooi ander skole uit om julle deel te doen in hierdie verdienstelike projek. Daagliks word leerders gekonfronteer met mishandeling, verwaarlosing en misbruik. Op vindingryke maniere het hulle leer om dit weg te steek vir diegene wat daagliks hulle pad kruis. Leer om hulle wat probeer onsigbaar tussen ons beweeg, raak te sien en maak 'n verskil aan hulle lewens.

Tydens Kinderbeskermingsweek kan jy met 'n R5

'n reuse verskil maak!!!

'n Groen strikkie-DANKIE vir Laerskool Eureka

'n Groen strikkie-DANKIE vir Newton Laerskool

Tommie: 'n Reuse dankie aan elke maat wat die GROEN STRIKKIEprojek ondersteun

Ek in lewende
lywe!!

Liewe Maats

Ek is só opgewonde, my stert kan eenvoudig nie ophou waai nie. As ek nou een van die maatjies was, het ek sommer aan die trippel gegaan, maar nou ja, ons honde kan nie trippel nie, maar ons kan bokspring en sodra ek hierdie briefie klaar geskryf het, gaan ek my vreugdespronge op die gras uitbaljaar.

Eerstens het Ouboet Ruben vir my gevra om vir julle te skryf en dis 'n heerlike pluimpie vir my, want dit beteken hy vertrou my met die administrasie. Ek sluit 'n foto van my in (as bewys) waar ek besig is om te skryf. 

Bewys van die 
koekies wat ek bak!

Julle wonder seker hoekom ek 'n voorskoot aanhet? 

Wel, ek is besig om koekies te bak vir Dutoitspan se kerkbasaar - julle weet mos ek is die een wat so graag vir ouma Annie in die kombuis gehelp het.

Tweedens wil ek al die maats van Eureka Laerskool uit die diepte van my hart bedank vir die reuse bedrag van R5 505,80. Dankie dat julle ons groen strikkie-projek so ongelooflik entoesiaties ondersteun.

Hierdie is nie net sommer 'n strikkie nie. Hierdie strikkie moet ons bewus maak dat al ons klasmaats en skoolmaats se huislike omstandighede nie so ideaal is nie. Ons moet weet dat geweld, uitbuiting en verwaarlosing ongelukkig deel is van sommige maats se lewens.

Hierdie GROEN STRIKKIE sê wat hierdie maats nie kan sê nie. Dit beteken ons moet baie meer sensitief en met oop oë deur die lewe gaan.

Dankie, Newton Laerskool dat julle nou ook deel is van hierdie wonderlike projek. Noord-Kaap, julle lyk my is sterk tweede in hierdie wedloop. 

Ek gaan op hierdie stadium my nek uitsteek, sonder om Ouboet Ruben te vra, maar ek daag die ander skole van Kimberley uit om deel te neem aan hierdie verdienstelike projek.  

Tyd raak min. Onthou, 28 Mei tot 5 Junie is Kinderbeskermingsweek!

Julle maats wat al klaar gekoop het, moet asseblief die ander outjies aanpor om ook deel te neem. Een R5 klink nie baie nie, maar honderde R5'e laat die skaal in die guns van die projek swaai.

Nou, my liewe maats, gaan ek eers 'n bietjie blaf, spring en katjie van die baan wees.

GROEN STRIKKIE-groete van 'n baie opgewonde ekke!

Tommie van Christina Kiddie Kinder- en Jeugsorgsentrum