Christina Kiddie Kinder- en Jeugsorgsentrum sê dankie!!

Ruben sê dankie!

Liewe Maats

Dis weer tyd om die pen op te neem en hierdie keer is dit om dankie te sê. Dankie het net twee lettergrepe, maar dis 'n woord wat gelaai is met tonne positiewe ione of kilogramme vir diegene wat al lankal uit die skool is en nie meer kan onthou wat ione is nie. (Gelukkig kan ek vir Tommie vra as ek twyfel oor iets, want hy is nog op skool!)

Dankie-sê in wording

Vandag wil ek 'n uit-die-hart-dankie-sê vir ds. Johan en Annelie Bothma van die Kerk van die Nasarener. Dankie dat julle elke jaar die behoefte raaksien dat die inwoners van Christina Kiddie Kinder- en Jeugsorgsentrum net kan baat by 'n vakansieprogram. Dit maak die vakansie korter, hulle ontmoet nuwe maats en die gesprekke strek verby die begrensde mure van die koshuis en die geestelike kos en padkos se waarde is onmeetbaar. Dankie dat julle geen moeite ontsien om ons in te sluit en te omvou met warmte, omgee en liefde nie.

Ek is mos 'n hond met 'n uitstekende gehoor en elke dag as hulle opgewonde en geselsend van die Bybelskool af teruggekom het, kon ek duidelik hoor dat hulle dit geniet het. Hulle stories en gesprekke het anders geklink. Nie die normale klaery of foutvindery nie, maar positief - ek wil my verstout deur te sê ek het hoop gehoor.    

Saad van hoop, is toekomssaad - dis iets wat jy in jou hart bêre en wat as dit genoeg tyd kry om te ontkiem - 'n gedagte - 'n droom - 'n werklikheid word.

'n Hartsdankie vir elkeen by die 
2025-Bybelskool!

My hartswens is dat hierdie kinders oor 'n jaar of 10 na julle sal terugkom en vir julle kan vertel wat hierdie Bybelskool gedurende die vakansie vir hulle beteken het, dalk hulle oë oopgemaak het of hulle lewensuitkyk verander het.

Deesdae se jongmense is nie meer lojaal aan die kerk nie, en baie reken dis iets vir die ou mense. Baie keer kla jongmense as hulle saam met hul ouers moet kerk toe gaan - ek hoor dit by elkeen se troetelhond, want ons honde skinder ook onder mekaar en ons kan dit oor kilometers heen doen en almal kan dit hoor en elkeen lê 'n spreekwoordelike eier. Ons spesie is op hoogte van alles wat in die dorp gebeur. Ek kan net dink hoe al die nuus wat ons so heerlik uitbasuin die misdaadsindikate tot voordeel sou strek as hulle maar net Blafiaans kon verstaan. Maar totdat AI nie Blafiaans kan ontsyfer nie, is ons veilig en blaf ons lustig voort. 

Wat is die oplossing? Die kinders moet aktief by die kerk betrek word. Hulle moet voel hulle wil daar wees. Dit moet vir hulle lekker wees - 'n plek van opgewondenheid, veiligheid en geborgenheid.

Ons elkeen het 'n verantwoordelikheid teenoor kinders, veral die outjies wat op die grondpaaie en verspoelde paaie van die lewe geland het.

Ons winterbederf!

Dankie, tannie Christelle, dat jy ons leer van dankie sê. Dankbaarheid is een van die lewenspilare van hoop. Tasbare dankies gee vlerke aan uitreikkilometers. Jy stel 'n voorbeeld vir ons klomp wat van ons beter honde en mense maak. Dankie dat jy vir ons omgee en dankie vir ons lekker winterhondebederf! Ons sien dit raak en ons spog in Blafiaans dat die meetsnoere vir my en Tommie in lieflike plekke geval het.

Nou ja, maats, dit is met 'n dankbare hart dat ek julle groet tot volgende keer.

Ruben

Binnekringnuus: KJSS se dankie vir die Bybelskool

Korrespondent: Ons is dankbaar trots op ons drie kringleiers wat by die Kerk van die Nasarener 'n geleentheid gekry het om hul leierskapsvaardighede te slyp. 

Ons is dankbaar dat elkeen van die inwoners die geleentheid gekry het om die Bybelskool by te woon - die vervelingsfaktor is goed gekelder deur die erns en die luim wat mekaar afgewissel het.

Ons dankie-sê-bydrae kom in die vorm van 'n choc chip-koekie, met 'n boodskap uit die Bybel. Gaan lees dit, glo dit en leef dit! 350 choc chip-koekies het hulle weg gevind na o.a. elke kind, leier, personeel en werker.

Dankie, ds. Johan en Annelie, saam met julle span, vir wyse waarop julle alles georganiseer en gekoördineer het. Leierskap het die fondament vir spangees gevorm. 

Sterkte en seën met julle mooi en goeie werk. 

'n Uit-die-hart-dankie vir 'n ongelooflike kinderfeesspele

Aan ds. Johan Bothma, Annelie en die Bybelfeesleiers van die Kerk van die Nasarener 'n baie groot dankie dat julle ons kinders ingesluit het in 'n ongelooflike vakansieprogram. Mag die saad wat julle met soveel deernis en entoesiasme gesaai het, ongekende vrug dra! 

Hierdie week het nie net die vakansie "korter" gemaak nie, maar broodnodige pitkos verskaf waaraan daar nog baie lank herkou sal kan word. Waardes, lewenslesse, beginsels, etiek en geloof is ingebou saam met 'n dag se bedrywighede. Julle moeite en omgee gaan nie ongesiens verby nie. 

KJSS se trots: Baie sterkte!

Heerlike vakansie-aktiwiteit

Wat is lekkerder as koekies bak? Miskien om die koekies te doop in 'n beker koffie en dit proe-proe te eet? En die hele bakproses in daardie enkele hap te proe, sien en voel? 

Meng en proe in die kombuis is altyd lekker en so bietjie mors op die tafel tydens die meng, uitrol en uitdruk is mos toelaatbaar. Tussendeur kan 'n mens mos ook na hartelus proe of die bestanddele darem in die regte verhouding is. Vrydag was 'n goeie dag vir bak en brou en die resultate was pakkie vir pakkie die moeite werd.

KJSS-vakansieprogram

Lang warm dae in Kimberley tydens die lang Desember-skoolvakansie vra vir 'n vakansieprogram. 

Christelle Hattingh sê dat die program nie net lekker gaan wees en groot pret aan die kinders verskaf nie, maar dit gaan ook goed wees vir hulle groot en klein motoriese vaardighede. Met Kersfees net om die draai, het die entoesiastiese deelnemers vandag elkeen hul eie kartonkeël gekry om sy of haar eie Kersboompie te maak. Dit het almal se belangstelling geprikkel, want hulle het die afgelope naweek vir Kersvader in lewende lywe ontmoet en met die besoek van nog 'n Kersvader in die pyplyn, het hulle kreatiwiteit nie perke geken nie. 

Hulle voltooide Kersboompies gaan as tafelversierings in die eetsaal dien. 

Voordat die deelnemers aan die werk gespring het, het tannie Estelle gesorg dat die energievlakke op die regte hoogte is vir Kersboominspirasie. 

Foto's: Christelle Hattingh

Park run word padloop in Gariep

Foto's: Christelle Hattingh

Die kinders van Gariep is aktief besig om deur hulle vakansieprogram te werk. Stap was vandag op hulle program. En dit het hulle sommer met oorgawe gedoen. Buiten die feit dat hulle 'n bietjie oefeninge doen en ook energie verbrand, het hulle vandag 'n stapmaat gehad, by name me. Christelle Hattingh. Dit het die stap sommer dubbel so lekker gemaak, want stories en grappies word deel van elke tree.

Gariep-woongebied is 60 km van Groblershoop af op pad na Upington.

Nog foto's hier.

Lees: 'n heerlike vakansie-aktiwiteit