Rosetta se goeie wense:

Mag ons die vreugde van die goeie nuus, hierdie Kerstyd, sigbaar maak.

Mag die vreugde van Kersfees vir ons elkeen ’n waarheid wees.

Rosetta se goeie wense:

Mag die boodskap van redding aan almal bekend wees,

en mag die vreugde van Kersfees ons lewens vul.

Kersvader se verrassingsbesoek

Foto's: Christelle Hattingh

[Klik HIER vir nog inligting].

Kimberley Bakkie Centre loop of liewer ry die ekstra myl

26 inwoners kon hulle oë nie glo toe kersvader se bakkie voor die koshuis stop nie. Dit is beslis die grootste en lekkerste verrassing van 2023. 'n Ekstra groot dankie aan Bakkie Centre wat vir Kersvader vervoer het en wat ook gesorg het dat al die geskenke, eetgoed en pizza hul eindbestemming veilig bereik het. Kersvader het sommer aan Bakkie Centre se deur geklop vir assistente om hom te help - elke inwonertjie se gesig is met Kersvaderverf ingekleur - wat hierdie verf so spesiaal en uniek maak, is dat dit gemeng word met baie liefde, klomp laggies en vakansievrolikheid. Almal is bly, lag baie en maklik en elke keer as jy aan hierdie spesiale dag dink, sorg hierdie verf  dat daar dadelik 'n groot glimlag op jou gesig verskyn.

Bakkie Centre, ons wense vir julle vir hierdie feesseisoen is dat elkeen oorvloediglik geseën sal word, dat die vreugde van Kersfees wat julle so mildelik uitdeel, deel sal word van 'n voorspoedige 2024. Dankie vir die voetspore wat julle in mense en kinders se lewe laat.

Kersboodskap

Mag ons hierdie Kersfees minder koop en meer weggee.
Mag ons hierdie Kersfees minder na skerms kyk en meer na mense.
Mag ons hierdie Kersfees minder skinder en meer waardering uitspreek.
Mag ons hierdie Kersfees minder slegsê en meer bid vir ons land.
Mag ons hierdie Kersfees minder motors verbyjaag en meer stoppe langs die pad maak.
Mag ons hierdie Kersfees minder dinge najaag en meer wag op God.
Mag ons hierdie Kersfees minder met ons familie baklei en meer oomblikke van saamwees koester.
Mag ons hierdie Kersfees minder veroordeel en meer voordeel van die twyfel gee.
Mag ons hierdie Kersfees minder eet en meer gaste oornooi.
Mag ons hierdie Kersfees minder bedien word en meer dien.
Mag ons hierdie Kersfees minder drink en meer van die lewe proe.
Mag ons hierdie Kersfees minder soek en meer ontvang.
Mag ons hierdie Kersfees minder vra en meer dankie sê.
Mag ons hierdie Kersfees minder uitsluit en meer innooi.
Mag ons hierdie Kersfees minders voornemens vir onsself maak en meer verbintenisse aan ander.
Mag ons hierdie Kersfees minder beplan en meer droom.
Mag ons hierdie Kersfees minder vermaak word en meer rus.
Mag ons hierdie Kersfees minder verlang en meer onthou.
Mag ons hierdie Kersfees minder eensaam en meer geliefd wees.
Mag ons hierdie Kersfees minder seker wees en meer glo.
Mag ons hierdie Kersfees minder wens en meer hoop.
Mag ons hierdie Kersfees minder geluk soek en meer liefde deel. Mag ons hierdie Kersfees minder praat en meer luister.
‘n Kersfeesboodskap – Tinus van Zyl [tinusvz@durbanvillegemeente.co.za]
[Geleen]