Statistiek: Mattewis hou 'n wakende oog oor die e-lesers

Mattewis: "Voordat iemand my weer beskuldig dat ek 

nie my werk doen nie, wil ek net die kykertal met julle deel. 

Daarna gaan ek 'n vinnige uiltjie tydens my etensuur knip, 

voordat ek weer katlewendig die res van die middag aanpak. 

Klik HIER en gaan kyk dat ons 5000 e-besoeke in 5 dae gehad het. 

Geen wonder ek is uitgepoot nie!"

Statistiek: (Katterige) bewyse dat die leesgrafiek opwaarts neig

Mattewis bly in voeling met sy werk

Mattewis kan hierdie werk toe-oë doen en foto-bewyse 

dat hy sy vinger (poot) op die pols het, onderstreep die feit

dat 'n mens-assistent nie 'n kat se kans teen Mattewis het nie! 

Foto: Christelle Hattingh

Gelukkige Vrouedag

Statistiek: Ons wil nie slapende honde (katte?) wakkermaak nie, maar ...

Na aanleiding van die berig vroeër vandag, wil die redaksie net 'n regstelling maak. Dit blyk dat sommige mense ook werk kan verrig terwyl hulle slaap.

Miskien moet daar nie na Mattewis as kantoorassistent gekyk word nie, maar moet hy dalk 'n nuwe posbeskrywing kry - eerder iets in die bemarkingsafdeling??

Die afgelope week het 3000 e-lesers die blad besoek en vandag het baie vinnig die 229 000-kerf gehaal na Mattewis se berig verskyn het.

Miskien het hy nie net nege lewens nie, maar dalk ook 'n negende sintuig wat hy inspan terwyl hy slaap. 

Nuwe besems vee altyd skoon - selfs in die diereryk

Foto's spreek baie luider as wat woorde ooit kan doen. En hier is 'n bewys daarvan. Mattewis was met sy aankoms by Christina Kiddie baie betrokke by alle kantooraktiwiteite. Dit was asof hy verantwoordelik gevoel het vir alles wat in die kantoorblok gebeur het. Hy het op die lessenaar gesit om die groenstrikkiedag se kaartjies deur te lees om te kyk of daar enige spelfoute is (foto dien as bewys.) Alle fotostate wat gemaak is, is deeglik gekontroleer, geverifieer, geïnspekteer voordat dit gebruik kon word (weer 'n foto as bewys.)

Mattewis se betrokkenheid het egter drasties afgeneem en daarvoor is daar ook bewyse. Die aktiewe betrokkenheid het geleidelik verander na 'n heelwat stadiger pas. Daar is meer gesit en gelê en deesdae is die hoofaktiwiteit slaaaap!

Die stoel vir gaste is nou geannekseer vir slaap - enige tyd van die dag is 'n goeie tyd vir dié gunsteling aktiwiteit. 

En wat doen hy as daar wel gaste in die kantoor instap? 

Hy loer so met die een oog na hulle, gee 'n groot gaap, draai hom om en ... slaap ongestoord verder.

Is dit nie wat ons mense ook doen nie?

Hou maar gerus 'n nuwe besem dop - en kyk hoe laissez-faire daardie selfde mens word met verloop van tyd ...

Foto's: Christelle Hattingh