Koester Karos koester sy medewerkers

Koester Karos is bevoorreg om medewerkers te hê wat weekliks 'n bydrae lewer. Hierdie jaar is bydraes gelewer deur Katelyn Marais, Portia Kgopodithata, Rosetta Venter, Ruben en die NK-vrywilligers.

Voordat almal besig raak met hulle vakansiedinge en by hul families gaan kuier, (of dalk kuiermense en speelmaatjies kry), wil ons uit Koester Karos-geledere baie dankie sê vir julle volgehoue en raaksê-bydraes. Julle insette word opreg waardeer. Party van julle het julle melktande op hierdie blog geslyp. Moenie ophou om te skryf en mense rondom julle te motiveer nie. Ruben het besluit hy gaan sy aanslag volgende jaar 'n bietjie verander en ons kan nie wag om te sien wat uit sy pen gaan kom nie. 

Geniet julle Kersseisoen, onthou om uit te reik na hulle wat baie minder as jy het. Liefde is baie meer as gekoopte geskenke onder 'n Kersboom, wat se waarde daagliks afneem. Heerlike eetgoed in 'n helderkleurige bakkie vir hulle wat karre oppas, sekuriteitswerk doen of hulle wat sorg dat jy petrol in jou kar het en orals kan rondry, saam met mooi en opregte wense, los spore van liefde.

Mag 2025 vir elkeen van julle 'n besondere blomjaar wees. Onthou altyd: Koester jou geliefdes. Ons sien uit na julle bydraes!

Katelyn Marais:

Portia Kgopodithata:

NK-vrywilligers:

Rosetta Venter:

Ruben:

Dinsdaggedagtes is wengedagtes

• 

Een van Koester Karos se weeklikse medewerkers, Katelyn Marais, het vanjaar weer presteer op AfriSkuld-LIG-konsert wat vanjaar vir die vierde keer aangebied is. LIG staan vir “Liefde In Gestremdheid”

Die konsert is geskep met die visie om mense met gestremdhede op te hef en is op 19 September in Pretoria aangebied. Vanjaar se tema was: “Die lewe skuld jou niks, as ek kan, kan jy ook.” Daar is elke jaar drie afdelings nl. poësie, prosa en redenaars. 

Katelyn het in die poësie-afdeling deelgeneem en is aangewys as die wenner in hierdie afdeling. Gedigte lê Katelyn na aan die hart. Sy hou van woorde en die krag van woorde en het ook al haar hand aan skryfwerk gewaag. Koester Karos is baie baie trots op haar en dankie vir jou weeklikse bemoedigende boodskap. 

Sy was in die bevoorregte posisie om met 'n paar van die kunstenaars te gesels wat ook haar rolmodelle die afgelope vier jaar geword het. Mathys Roets (foto), Prop, Sonja Heroldt en Ruan Josh het hierdie aand met die deelnemers gedeel. Die Mathys Roets-toekenning was deel van die spesiale pryse wat uitgedeel is. Hierdie kunstenaars het self al uitdagings op hulle lewenspad gehad en kan daarom diegene bemoedig en motiveer wat meer opdraandes in die lewe het as die gemiddelde mens.  

Lees gerus elke Dinsdag die Dinsdaggedagtes van Katelyn Marais.

Klik HIER om die koerantberig te lees.