Ruben-idiome: Koffie

'n Ou Ethiopiese idioom lui: een, twee, drie koppies, en dan is ons vir altyd vriende. Ek hoop, liewe maats, dat ons aan die einde van twee maande se koffie-idiome kan sê: "Ons is vriende."

* Jy is sommer op die koffie.

Betekenis: Jy praat sommer onsin.

* Sy geheue is op die koffie.

Betekenis: Hy onthou nie baie goed nie.

* Vat jy die koffie soos die kan hom skink.

Betekenis: Berus jy in jou lot. (Tevrede wees met wat jy kry)

* Hy drink die koffie van sy mamma af.

Betekenis: Hy drink sy koffie swart en bitter.

* Hy koffie maar aan.

Betekenis: Hy sukkel maar voort.

* Hy jaag sy koffie deur die vlei.

Betekenis: Hy gooi warm koffie in ’n piering, blaas daaroor om dit te laat afkoel voordat hy dit drink.

* Haar ma se koffie smaak nie meer lekker nie.

Betekenis: Gesê van 'n kêrel wat nie meer by die meisie wil gaan kuier nie.

Ruben-idiome: Koffie

Ilse Zietsman skryf in haar blog: 'n Ethiopiese legende lui dat ‘n bokwagter genaamd Kaldi eeue gelede koffie ontdek het. Of om meer spesifiek te wees - Kaldi se bokke het die koffiebone ontdek. Kaldi het opgelet dat sy bokke ekstra woema gehad het na hulle helderrooi bessies van 'n sekere boom geëet het.

Kaldi het vir die ab van die plaaslike klooster (abdy) hiervan vertel. Die ab het dieselfde bessies gebruik om 'n drankie voor te berei en toe agtergekom dat hy vir langer kon bid ná hy dit gedrink het. Van hier het die woord versprei tot waar koffie vandag een van die gewildste drankies ter wêreld is.

'n Ou Ethiopiese idioom lui: Een, twee, drie koppies, en dan is ons vir altyd vriende.

* By haar is sy koffie bitter.

Betekenis: Sy hou nie baie van hom nie.

* Hulle is lief vir koffie drink.

Betekenis: Hulle skinder graag.

* Hy is so skelm, hy sal die melk uit jou koffie steel.

Betekenis: Hy is uiters geslepe.

* Haar koffie vlek die koppie.

Betekenis: Sy maak haar koffie baie sterk.

* Hy het êrens 'n trekseltjie koffie gaan vra.

Betekenis: Hy gaan kuier iewers by 'n nooi.

* Hy sal nog sy koffie kry.

Betekenis: Daar sal nog met hom afgereken word.

Ruben-idiome: Koffie

Week 19 en ons is amper op die hond se stert met die koffie-idiome. Nog twee sessies en ons verander 'n bietjie die spyse.

* Jy kan die koffie met 'n mes sny.

Betekenis: Die koffie is baie sterk.

* Sy kan darem al koffie skink.

Betekenis: Sy is oud genoeg om te trou.

* Jou koffie stort nou-nou.

Betekenis: Jou probleme is baie naby.

* Wanneer kry ons dan soet koffie.

Betekenis: Wanneer trou julle?

* Hy lieg die melk uit jou koffie.

Betekenis: Hy vertel geweldig leuens. 

* Hy drink swart koffie sonder suiker.

Betekenis: Hy is erg swartgallig.

Ruben-idiome: Koffie

Ouma Annie van Petrusburg is baie lief vir idiome en saam met ons koffie en ouma se spesiale kleinkoekies, het ons ook idiome op 'n daaglikse basis ingekry. Ouma Annie se reëls was maklik en verstaanbaar. Jy leer jou idiome en jy kry koekies saam met jou koffie ... óf jy ken nie jou idiome nie, dan is die koekies in die was.  

* Hy kom altyd op die koffie daaraan.

Betekenis: Hy kom ongenooid op etenstyd daar aan.

* Ek is op die koffie met my werk.

Betekenis: Ek het agtergeraak met my werk.

* Sy koffie is vroeg reeds omgeroer.

Betekenis: Daar is lank gelede vir hom geldelike voorsiening gemaak.

* Die koffie ruk jou agteroor.

Betekenis: Die koffie is baie sterk.

* Die koffie is moeg.

Betekenis: Die koffie is baie flou.

* 'n Storm in 'n (koffie)koppie.

Betekenis: 'n Geskil oor 'n nietigheid.

Ruben-idiome: Koffie

Maats, maak 'n koppie koffie en kyk hoe logies is vandag se idiome. Net een deurlees en jy het jou koffie-idiome onder die knie. Geniet dit!

* Iets is op die koffie. 

Betekenis: Dit is stukkend.

* Alles is nie suiwer koffie nie.

Betekenis: Iets is nie pluis nie. 

* Is daar moer in die koffie? 

Betekenis: Daar is onmin. 

* Jou koffie is vol vlieë.  

Betekenis: Jy misgis jou.

* Ek koffie maar huis toe.  

Betekenis: As jy êrens heen koffie, verkas jy soontoe.

Ruben-idiome: Koffie

Vandag kyk ons na koffie-idiome. Dit lyk vir my na die maklikste idiome en terwyl jy aan jou koppie koffie sit en teug, leer jy sommer jou idiome.

* Oppas vir hom, hy sal die room uit jou koffie steel!

Betekenis: Hy is skelm.

* Hy is so maer, hy moet swart koffie drink om ’n skaduwee te gooi.

Betekenis: Dit word gewoonlik van iemand gesê wat baie maer is.

* Hy is 'n regte koffiepot. 

Betekenis: Iemand wat lief is vir koffie.

* Kaal koffie of koue koffie of koffie sonder ketel.

Betekenis: Bogenoemde verwys na brandewyn of ander sterk drank.

* Jou koffie stort nou-nou - is ’n waarskuwing. 

Betekenis: Jy soek skoor; pasop dat jy nie nou-nou huil nie.