Saturday, 30 August 2025

Ruben-humor: Ongewone raaisels

* Wat het die beet vir die aartappel gesê?
"Hou op om vir my ogies te maak, jy laat my rooi word van skaamte."

* Wat het die een teesakkie vir die ander teesakkie gesê?
"Hou op om teë te praat, netnou word ons in die warm water gegooi."

* Wat het die een magneet vir die ander magneet gesê?
"Ek vind jou baie aantreklik."

* Wat het die een bord vir die ander bord gesê?
"Die ete is op my.  

Thursday, 28 August 2025

Ruben se een minuut storie: Ek is 'n gewone mens. Ek kan net nie sien nie!


Maats, vandag plaas ek Morné se storie wat ek in hulle tydskrif, InFokus, raakgelees het. Hierdie merkwaardige verhaal moet met ander gedeel word en daarom plaas ek dit in sy direkte woorde.

My naam is Morné van der Merwe en ek is op Donderdag, 13 Augustus 1981, in Welkom in die Vrystaat gebore.  

Aanvanklik kon ons nie agterkom dat ek wel blind is nie. Eers op drie maande het 'n dokter bevestig dat ek aan 'n oogtoestand bekend as RETINALE DISPLASIE, ly. Dit beteken dat die retinas nie ten volle ontwikkel het nie. Vir my ouers was dit natuurlik 'n groot skok. In daardie jare was die persepsie taamlik algemeen dat blinde persone nie iewers in die wêreld sal kom nie.

'n Blinde fisioterapeut (ook 'n oudskolier van Pionierskool) van Welkom, Stafie Pelser, het ons in kontak gebring met die Pionierskool op Worcester en ek is in 1985 daar toegelaat.

My skoolloopbaan was een suiwer plesier; gekenmerk deur vreugde, hartseer en blydskap. In 1986 het ek die voorste lid van my regterwysvinger in 'n ongeluk verloor. Dit het beteken dat ek Braille moes lees met die middelvinger. Dit was 'n groot aanpassing. My vader is in 1989 oorlede en die verlies was (en is steeds) baie groot.

In 1999 het ek matriek geskryf en in 2000 begin studeer by die Pionierskool se afdeling vir loopbaanontwikkeling. My vakke was N4, N5, telefonie en kantoorpraktyk. In hierdie stadium kry ek ook vir Rabat, my gidshond. Ek het hom met gemengde gevoelens ontvang. Ek was skepties om my kierie te ruil vir 'n hond, maar na gereelde oefensessies deur die dorp met hom, erken ek nou dat ek vir Rabat met my lewe kan vertrou.

In 2001 het ek begin studeer aan die Universiteit van Stellenbosch. Ek was 'n bietjie op my senuwees vir die nuwe omgewing, maar met Rabat en my mobiliteitsintrukteur aan my sy het ons twee weke voor die klasse begin het die omgewing verken. Na slegs vier ure toe weet ek en Rabat reeds hoe om by my klasse uit te kom! Ek het baie vriende gemaak en bly in Huis De Villiers. Ek volg 'n BA Taal- en Kultuurkursus met vakke Afrikaans, Duits, Geskiedenis, Sielkunde en Musiek. Ek is baie lief vir musiek, veral my viool. Ek het reeds in graad 5 begin met lesse. Musiek bekoor my nog steeds.

Ek is trots om te bevestig dat ek en my blinde vriende die persepsie dat blinde persone nêrens in die wêreld sal kom nie, verkeerd bewys het!  

[Bron: InFokus, Nuus van die Instituut vir Blindes, Augustus 2001]

Wat het ek uit hierdie storie geleer?
* Mense wat nie kan sien nie, is gewone mense.
* Daar is in elkeen se lewe ontelbare genade, ten spyte van 'n klomp struikelblokke.
* Dat blinde persone wel êrens in die lewe kan kom.
* Moenie mense oordeel nie - loop eers in hulle skoene voordat jy 'n opinie uitspreek.

Saturday, 23 August 2025

Ruben-humor: Vreemde vergelykings

* Hy het hol wange ...
soos 'n toegeslane brood.

* Hy het 'n plooigesig ...
soos 'n merinoskaap.

* Hy het deurskynende ore ...
soos 'n vlakhaas.

* Hy het 'n knopneus ...
soos 'n bakoond.

* Hy het 'n stem ...
soos 'n koffiemeule.

[Hierdie gesegdes kom uit my Petrusburg-dae uit!]

Thursday, 21 August 2025

Drie minute dinkstorie: Groot wonderwerk vir ‘n klein boetie


Tessa gaan na haar kamer en agter in haar kas, in ‘n donker klein wegsteekhoekie, haal sy haar glas bottel met al haar spaargeldjies uit. Versigtig gooi sy die kleingeld op haar bed uit en begin die geld te tel. Sy tel die geld drie keer oor, om seker te maak dat die totaal korrek is. Sy gooi die munte terug in die glasbottel en draai die skroefdeksel terug. Versigtig plaas sy die glasbottel in haar rugsak en glip ongesiens by die agterdeur uit. Sy stap ses blokke ver om by die groot apteek in die stad uit te kom.

Geduldig wag sy dat die apteker haar help, maar hy was te besig om haar raak te sien. Tessa skuifel haar voete op die teëlvloer om ‘n skuurgeluid te maak, geen reaksie van die apteker nie. Sy maak op die onaardigste wyse keel skoon, maar steeds geen reaksie nie. Uiteindelik neem sy een van die munte uit haar bottel en tik daarmee op die glas toonbank. Die keer werk dit!
“En wat wil jy hê?” vra die apteker ongeduldig terwyl hy die gesprek met sy broer onderbreek wat kom kuier het. “Ek is besig om met my broer te gesels, wat ek jare laas gesien het,” sê die apteker, sonder om op ‘n antwoord te wag op sy vraag aan Tessa.
“Wel, ek wil met jou gesels oor my broer!,” antwoord Tessa in dieselfde geïrriteerde stemtoon as die apteker. “Hy is regtig baie siek ... ek wil ‘n wonderwerk koop vir hom.”
“Verskoon tog, wat sê jy daar kind?” vra die apteker. “Sy naam is Andries, en hy het iets slegs wat in sy kop groei en my pappa sê slegs ‘n wonderwerk sal hom nou kan red. So, hoeveel kos ‘n wonderwerk hier by julle?”
“Ons verkoop nie wonderwerke hier nie, meisie, ek is jammer ek kan jou nie help nie,” antwoord die apteker in ‘n baie sagter stemtoon.
“Oom, ek het geld om daarvoor te betaal. As dit nie genoeg is nie, sal ek die res in die hande kry. Vertel my tog net ... hoeveel kos so ‘n wonderwerk?”
Die apteker se broer, ‘n welgeklede middeljarige man, was ontroerd deur die klein meisie se pleidooi. Hy stap om die toonbank, gaan buk by die meisie en vra: “Watse soort wonderwerk het jou boetie nodig?”
“Ek weet nie,” antwoord Tessa terwyl die trane opwel in haar klein dogtertjie-oë.”Ek weet net hy is regtig baie siek en mamma sê dat hy ‘n operasie sal nodig hê. Maar my pappa kan nie vir die operasie betaal nie, so ek wil my geld gebruik om vir my boetie ‘n wonderwerk te koop.”
“Hoeveel geld het jy by jou?” vra die apteker se broer.
“Tien rand en vyf en vyftig sent,” antwoord sy in ‘n stemmetjie wat skaars hoorbaar is. “En dit is al die geld wat ek het, maar ek kan nog meer in die hande kry wanneer ek my sakgeld die einde van die maand kry.”
“Wel, wat ‘n toevalligheid is dit nou nie!” glimlag die man. “Tien rand en vyf en vyftig sent - die presiese prys van ‘n wonderwerk vir klein boeties.”
Hy neem Tessa se geld in die een hand en neem haar klein handjie in sy ander hand en sê: “Neem my na waar julle bly. Ek wil jou klein boetie sien en jou ouers ontmoet. Laat ons kan sien of ek die soort wonderwerk het wat jy benodig.”
Die welgeklede man was ‘n chirurg wat gespesialiseer het in neuro-chirurgie. Die operasie is gedoen sonder enige kostes en dit was nie lank daarna nie, toe is klein Andries terug by die huis en blakend gesond.
Ma en Pa het vol vreugde gesels oor hoe wonderlik alles uitgewerk het vir klein Andries. “Daardie operasie,” het Ma gefluister, “was ‘n werklike wonderwerk. Ek wonder wat so ‘n operasie sou gekos het?”
Tessa glimlag. Sy weet presies hoeveel ‘n wonderwerk kos ... tien rand en vyf en vyftig sent ... plus die geloof van ‘n klein kindjie.

‘n Wonderwerk is nie die opheffing van ‘n natuurlike wet nie maar die werking van ‘n hoër wet.

[Geleen op FB]

Saturday, 16 August 2025

Ruben-humor: Diereraaisels met 'n kinkel

* Wat het 'n spinnekop en 'n spietkop in gemeen?
Albei begin met die letter "S".

* Wat het 'n spinnekop en 'n spietkop in gemeen?
Albei span toue en kruip dan weg om hulle prooi te vang.

* Wat kry jy as jy 'n vampier met 'n vlooi kruis?
Baie bekommerde honde.

* Wat kry jy as jy 'n luislang met pasta kruis?
Spaghetti wat sommer self om jou vurk draai. 

Friday, 15 August 2025

Eureka Muddy Bash 2025

Wanneer: 13 September 2025

Waar: Vleissentraal Veilingskrale Kimberley

MOENIE OP JOU LAAT WAG NIE!!

Skryf in as 'n span of neem alleen deel!

Navrae: 087 310 5310

of

060 466 6676

EK HET REEDS INGESKRYF,
WAT VAN JOU?? 
 

Portia's Friday advice

Thursday, 14 August 2025

Ruben se een minuut storie: Seun sonder 'n hemp


Dis stil in dié klas. Mnr. Buys voel hoe sy binneste ruk, want hy weet hier is groot behoefte, maar ter wille van die dissipline van die klas moet die seun gestraf word. Hy versoek toe weer vir Klaas om sy baadjie uit te trek, en weer smeek hierdie maer verwaarloosde kind: "Meneer, ek sal enigiets doen, maar asseblief, Meneer, ek kan nie die baadjie uittrek nie."

Mnr. Buys kon ook nie toegee nie, en sê weer: "Kom, Klaas, uit met die baadjie" en toe Klaas sien hy gaan die baadjie moet uittrek, maak hy dit oop en laat dit stadig grond toe gly en staan voor die onderwyser met net die verflenterde ou broek aan sy lyf."
 
"Klaas, waar is jou hemp?" vra mnr Buys."Meneer, in ons huis is daar net een hemp en een baadjie en dit was vandag my boetie se beurt om die hemp te dra. En Meneer, ek het nie bedoel om die brood te neem nie, ek het gedink Jakobus gaan dit net weer in die asblik gooi soos elke dag, en ek was baie honger, en ek weet my boeties en sussie by die huis is ook so honger soos ek, toe dink ek hy sal nie eens agterkom dat die brood weg is nie. Hier is dit, Meneer." Hy plaas die oorblywende broodjies op die tafel.

Mnr. Buys het gemaak of hy na iets op die bord kyk om hom geleentheid te gee om sy emosies onder beheer te kry.
 
Toe draai hy om en sê: "Klaas, jy verstaan dat ek wel die dissipline moet toepas. Jy verstaan dat ek nie 'n uitsondering kan maak nie," en Klaas kyk hom in die oë en sê: "Ja, Meneer, ek verstaan" en toe buk hy. Mnr. Buys tel die rottang op om die eerste hou te slaan, toe breek Jacobus se stem die stilte in die klas: "Wag, Meneer, moenie hom slaan nie." 

Mnr Buys kyk na Jacobus en sê: "Nee, Jacobus, jy weet dat die straf moet toegepas word vir die oortreding van julle reëls."

"Ja, Meneer, maar moenie hom slaan nie, hy was baie honger en het aan sy boeties en sussie by die huis gedink. Ek sal liewer in sy plek kom buk om sy straf wat hy moet kry, te vat."

Jacobus staan op en stap vorentoe. Daar was nie 'n droë oog daardie dag in daardie klas nie.

Wat het ek uit hierdie storie geleer?
* Jesus het voor die VADER gestaan en gesê: "Asseblief, VADER, moenie hulle straf nie. EK sal in hulle plek die straf op MY neem.
* Kom ons maak 'n punt daarvan om elke nuwe dag vir God dankie te sê vir die straf wat HY namens ons gedra het. 
* Moenie kos mors nie - daar is te veel mense wat nie kos het nie.
* Dink voor jy praat.
* Doen aan andere wat jy graag wil hê aan jou gedoen moet word.

[Dankie, Rosetta, vir die aanstuur van hierdie verhaal.]

Wednesday, 13 August 2025

KJSS se Vogue-modelle

Christina Kiddie Kinder- en Jeugsorgsentrum se assistente is gerat vir hul daaglikse take in hul nuwe uniforms. Ons is ongelooflik dankbaar teenoor Lotto en Elbrie wat gesorg het vir die modieuse dog praktiese uniforms. 

Foto's: Christelle Hattingh

MAMMAS: Ietsie om 'n bietjie oor te lag!

Antwoorde gegee deur graad 2-outjies.

Hoekom het die Here mammas gemaak?
1. Sy is die enigste een wat weet waar die sellotape en prestick is!
2. Sy moet eintlik net die huis skoonhou.
3. Sy moet ons uithelp as ons gebore word.

Hoe het die Here mammas gemaak?
1. Hy het grond gebruik net soos met almal van ons.
2. Hy het bonatuurlike kragte en baie tou gebruik.
3. Die Here het my ma gemaak net soos vir my. Hy het net groter goed soos kop, arms en bene en goeters gebruik.

Van watter bestandele is mammas gemaak?
1. Die Here het mammas gemaak uit wolke, engeltjievlerkies en hare en baie ander lekker goed in die wêreld. Maar ook 'n klein bietjie weird goed, want sy is partykeers kwaai.
2. Hulle het begin om mammas te maak van mans se bene, maar ek dink hulle het meestal 'n klomp tou en lyn gebruik.

Hoekom het jy JOU mamma gekry en nie sommer enige ander mamma nie?
1. Ons is familie.
2. Die Here het geweet sy hou meer van my as ander kinders.

Toe jou mamma klein was, watter soort dogtertjie was sy?
1. My mamma was altyd net my mamma en niks van daardie ander soort goed nie.
2. Ek weet nie, want ek was nie daar nie. Maar ek dink sy was nogal baie baasspelerig.
3. Hulle sê sy was baie gaaf en lief.

Voordat sy met jou pa kon trou, wat moes sy van hom weet?
1. Sy van ...
2. Sy moes weet van sy agtergrond. Lyk hy soos 'n skelm? Word hy dronk as hy bier drink?
3. Maak hy ten minste R56 000,00 per jaar? Sy moet weet of hy JA of NEE gesê het vir drugs. Ook of hy JA of NEE sê vir los werkies soos huiswerk?

Hoekom het jou mamma met JOU pappa getrou?
Die beste ene ooit!!!!
1 . My ouma sê sy kan dit nie verstaan nie, my ma het seker nie mooi reguit gedink nie.

Wie is die baas in julle huis?
1. Mamma wil nie die baas wees nie, maar sy moet, want sy sê my pa is dom-onnosel.
2. Ma is. Jy kan dit sien as sy na my kamer kom kyk. Sy sien al die goed onder die bed raak.
3. Ek dink my ma is die baas. Maar net omdat sy soveel meer goed het om te doen as my pa.

Wat is die verskil tussen ma's en pa's?
1. Mammas werk by die werk én hulle werk by die huis. Pa gaan werk net by die werk.
2. Mammas weet hoe om met my juffrou te praat sonder om haar bang te maak.
3. Pappas is groter en sterker, maar mammas het invloed en gesag, want jy moet haar vra as jy by 'n maatjie wil gaan oorslaap.
4. Mammas het 'n towerstokkie. Hulle kan jou beter laat voel sonder medisyne.

Wat doen jou mamma in haar vrye tyd?
1. Niks. Want Mammas het nie vrye tyd nie.
2. Jy moet haar hoor! Sy betaal rekeninge die hele dag lank.

Hoe kan mens jou mamma perfek maak?
1. Aan die binnekant is sy reeds perfek ... Buitekant ... ek dink een of ander soort plastiese operasie.
2. Die kleur van haar hare. Ek dink miskien blou.

As jy iets kon verander aan jou ma, wat sal dit wees?
1. Sy het hierdie nare ding in haar kop dat ek my kamer moet aan die kant hou. Ek sou daarvan ontslae raak!
2. Ek sou haar slimmer maak, dan sal sy weet dit was my sussie wat dit gedoen het en nie ek nie.
3. Ek sou graag wou hê daardie onsigbare oë agter in haar kop moet uitval!

[Dankie, Rosetta vir die aanstuur van juwele.]

Sunday, 10 August 2025

En dit is genoeg ...

Sommige dae staan jy nie op nie.
Jy rol om, kyk na die muur en wonder of God se stem nog steeds die kant van die bed bereik waar jy opgehou het om voor te gee.

Jy het nie die woorde nie.
Nie die dapperes nie.
Nie die "Ek is oukei"-es nie.
Net die soort wat bewe en in die middel van 'n sin wegraak omdat hartseer nie sy gedagtes voltooi nie.

Jy blaai verby verse wat voorheen soos suurstof gevoel het.

Jy krimp ineen by die klank van aanbidding omdat dit jou herinner aan 'n weergawe van jouself wat jy nie nou kan bereik nie.

En steeds is jy nie vergeet nie.
Nie verlate nie.
Nie minder geliefd omdat jou arms te lam is om dit op te lig nie.

Hy sien jou.
Nie die Sondag-jy nie.
Nie die bediening-jy nie.
Die jy wat in die stort huil en fluister
"Ek weet nie meer hoe om dit te doen nie."

Jesus deins nie terug vir jou eerlikheid nie. Hy sit in die stilte saam met jou, onverskrik vir jou vrae, onbewus deur jou gemors.
 
Jy is steeds Syne.
 
Wanneer jou geloof gebreek voel.
Wanneer jou hoop op "life support" is. Wanneer jou hart 'n slagveld is en jou liggaam te moeg is om te veg.

Steeds Syne.
Steeds uitverkore.
Steeds vasgehou.
Steeds die moeite werd om lief te hê op die dae wat jy jouself nie herken nie.

Jy hoef nie oukei te wees om aan God te behoort nie.

Jy hoef nie oukei te wees om deur Hom vasgehou te word nie.

Jy hoef nie deur die pyn te glimlag of Skrif aan te haal deur die stilte nie.
Jy hoef nie te verduidelik hoekom jou hart voel asof dit breek selfs wanneer niks dramaties gebeur het nie.

Soms is die hartseer stil.
Soms is die moegheid onsigbaar.
Soms voel jou geloof soos 'n flikkering en jy wonder of Hy teleurgesteld is in jou.

Hy is nie.

Jesus meet nie jou waarde aan jou krag nie.

Hy sit langs jou op die plek wat jy gedink het te donker vir Hom is.

Hy spoor jou naam in die stof na.
Hy hou jou hand vas selfs wanneer jy opgehou het om na Syne te soek.

Jy is steeds Syne.

Steeds Syne wanneer jy in die stort huil.
Steeds Syne wanneer jy planne kanselleer omdat jy nie vandag kan voorgee nie.
Steeds Syne wanneer jou gebede klink soos "Ek kan nie meer nie."

Jy is nie 'n mislukte gelowige nie.
Jy is nie 'n teleurstelling nie.
Jy is nie te gebroke om liefgehê te word nie.

Jy is die een vir wie Hy gekom het.
Die een wat Hy weier om te verlaat.
Die een wat Hy dogter noem, selfs wanneer jou aanbidding net - net oorleef.

So wees net jouself.
Wees net die rou jy.
Laat Jesus toe om jou lief te hê sonder die masker, sonder die draaiboek en sonder die druk om te probeer sterk wees.

Jy is steeds Syne.

Jy moet net jy wees.
En dit is genoeg.

©2025 Pragtige JY - Is Genoeg
Kopiereg ~ Juanita Grobler

[Klik HIER vir Juanita Grobler se FB]

Saturday, 9 August 2025

Vrouedag


'n Wens vir hierdie Vrouedag en -maand van Koester Karos is eenvoudig: Vroue moet mekaar meer ondersteun en bemagtig. Hulle moet fyn ingestel wees op mekaar en daar wees vir mekaar. Vroue moet hande vat en saamwerk aan 'n omgewing waar hulle veilig kan voel. 

Die media wemel van geweld teenoor vroue en kinders. Sorg dat jy nie deel van die statistiek word nie. Vandag se vroue moet opstaan, saamstaan en die siklus van geweld breek.

Vroue is uniek, sterk en veerkragtig. Hulle ongeëwenaarde gees laat hulle sterker uit moeilike situasies kom. Mag 2025 se Vrouedag die begin wees van 'n gewaardeerde lewensreis.

Gelukkige Vrouedag!

Ruben-humor: Vreemde vergelykings

* Hy is so lank ...
dat as hy nog 'n half duim langer was, dan was hy lewenslank.

* Hy is so kort ...
dat as hy 'n half duim korter was, dan was hy 'n kortsluiting.

* Hy is so vet ...
hy loop nou agter sy maag aan.

* Hy is so maer ...
hy moet tweemaal staan om 'n skaduwee te gooi.

* Hy het sulke skewe tande ...
hy kan 'n appel deur 'n tennisraket eet.

Thursday, 7 August 2025

Ruben se een minuut storie: Die padda en die muis


Hierdie kort-kortverhaal handel oor 'n muis wat hulp van 'n padda soek om van die een kant van die stroom na die ander te kom.

Muis moes baie dringend aan die oorkant van 'n stewige stroom kom. Sy familie aan die oorkant is siek en Muis wil hulle gaan help. Omdat Muis nie kan swem nie, het hy allerhande planne gemaak om aan die oorkant te kom, maar die een plan was meer gevaarlik as die ander plan. Gelukkig sien hy 'n padda op 'n klip in die son sit en bak en besluit om hom te nader vir hulp. Hy ken nie dié padda nie en na heelwat mooi praatjies en beloftes stem die padda in om die muis te help. Muis maak homself aan die padda vas, want hy wil nie in die water val nie. Padda het egter ander planne gehad en duik in die water in net nadat Muis homself stewig op Padda se rug vasgemaak het. Padda bly lank genoeg onder water totdat hy seker is die muis op sy rug het verdrink.

Padda swem met 'n groot glimlag op sy gesig na bo en spring op sy gunstelingklip. Hy kan nie glo dat die muis hom so maklik geglo het nie en sonder enige moeite het hy 'n kitsmiddagete op sy rug. Hy was nog besig om die toue los te maak waarmee Muis homself vasgemaak het, toe word hy deur meneer Valk opgetel. Meneer Valk is op sy beurt baie in sy skik dat hy twee porsies kos kry met net een poging.

Wat het ek uit hierdie storie geleer?
* Moenie iemand vertrou wat jy moet smeek om jou te help nie.
* Moenie vreemdelinge vir hulp vra nie.
* Moenie iemand wat jou hulp nodig het, te na kom nie.
* Jy kry van jou eie medisyne terug, as jy vir ander lieg.

Wednesday, 6 August 2025

Besoek van die St Cyprians-engele



Dankie, Coleen, dat jy die groot skenking namens die St Cyprians Guilde kom aflewer het. Julle vriendelike omgee is 'n riem onder ons hart! Mag julle van krag tot krag gaan. KJSS-vreugde!

Monday, 4 August 2025

'n Besoek van die FNB-vrywilligers-engele


'n Groot dankie vir die 20 groot kospakkies, o.a. 2 liter olie, 20x10 kg mieliemeel en 20x10 kg stampmielies. Dis 'n yslike groot present wat die FNB-vrywilligers kom aflewer het. Ons waardeer dit uit ons hart uit. Seën op julle goeie werk. KJSS-vreugde!

Mense moet wakker word ...

Jou kind word uitgeput wakker.
Nie omdat hy siek is nie.
Want dit is 06:00.
Jy gooi vir hom bokspap in die oggend
Nie omdat dit gesond is nie.
Want dit is vinnig.
Hy staar na 'n iPad.
Nie omdat dit goed vir hom is nie.
Want jy moet gereed maak vir werk.
Die skool bel later:
"Hy kan nie fokus nie"
"Hy kan nie stilsit nie"
"Hy moet getoets word"

Die dokter skryf 'n voorskrif uit.
Nie omdat jou seuntjie stukkend is nie.
Want die stelsel is.
Die waarheid?

Sy brein veg:
- Chemiese voedselkleurstowwe
- Te veel suiker
- Skermverslawing
- Slaapgebrek
- Natuurlike energie

Maar ons behandel die kind
In plaas daarvan om die oorsaak reg te stel.

Jou oupa se kinders het:
- buite gespeel
- regte kos geëet
- lekker geslaap
- vrylik beweeg

Geen pille nodig nie.

Moderne ouerskap is nie gerief nie.
Dis oorlogvoering. Teen jou eie kind.

Gee hom 'n kans:
- Skoon kos
- Regte slaap
- Gratis spel
- Natuurlike beweging

MOENIE vir hom pille gee nie.
Die stelsel wil pasiënte hê.

DIE NATUUR HET KRYGERS GEMAAK.
KIES VERSTANDIG ...

Sunday, 3 August 2025

Gedig: Oudleerder van die Pionierskool in Worcester

Hy, die boom in die middel van die tuin,
       'n verbode vrug beslis.
  Goed, kennis swaai aan sy takke,
  maar die kwaad kom dieper tot rus. 

       Job se geduld dié het hy baie,
  maar ook Jona se hardkoppigheid geërf.
Soos salomo spreek hy woorde van wysheid,
  maar die roet het aan sy tent begin kerf.

       'n Simson is hy wanneer Filistyne toesak, 
  maar tog ook sy swakheid voor Delila betuig.
Wanneer die rooi see van depressie hom laat versuip
       is dit Faroa wat in sy pompkamers juig.

In sy moedersbuik het die waters geswyg
       oor den één gebrek aan den vlees:
       'n blinde van ouds dié is hy nou.

* Rochelle Louw

* Drie gedigte van Rochelle Louw, 'n graad 12-skolier van die Pionierskool, is ingestuur vir die Afrikaanse woordfees 2001 poësie-kompetisie vir hoërskoolleerders.

Sy het die derde prys verower in hierdie kategorie. Sy het haar gedigte saam met ander skrywers en digters, voor 'n groot gehoor voorgelees in braille. Behalwe vir haar natuurlike poëtiese talent, is dit voorwaar merkwaardig dat sy binne 'n kort tydperk braille kon bemeester.

Haar optrede was met selfvertroue en oortuiging. Pionierskool is baie trots op haar! Rochelle het erkenning van alkante gekry (ondert andere ook belangstelling van 'n joernalis van die tydskrif "Insig").
  
[Bron: InFokus, Nuus van die Instituut vir Blindes, Augustus 2001]

Saturday, 2 August 2025

Ons kan julle nie borg nie, maar ons kan help adverteer!! Sterkte!


Die eksklusiewe HelpJag Legendes Gholfdag vind op 25 September 2025 by Serengeti Golf and Wildlife Estate plaas.
 
Hierdie dag gaan nie net oor die spel nie, maar ook oor die verskil wat jy in ons gemeenskap kan maak om hoop te bring waar dit die nodigste is.

Raak betrokke as borg of adverteerder: https://helpjag.co.za/gholfdae/

Dis is meer as net gholf...elke hou maak ‘n verskil!

Dankie vir die verskil wat Helpende Hand maak

HelpJag, 'n inisiatief van Helpende Hand, maak daagliks 'n verskil aan mense en kinders se lewens. Christina Kiddie Jeugsentrum was vandag aan die ontvangkant van hierdie wonderlike inisiatief. Woorde skiet te kort as so 'n pakkie stil-stil sy weg tot by die voordeur van die jeugsentrum vind.

Dankie vir die ongelooflike geskenk van 200 kg wildsvleis en 30 sakke aartappels. Hierdie is 'n heerlike bederf. Dankie dat julle in ons kinders glo en vir elke instansie waarby julle betrokke is, toekomshoop gee.

Ruben-humor: Diereraaisels met 'n kinkel

* Hoekom dra 'n hoender sy kam op sy kop?
Hulle dra nie kouse sodat hy dit daarin kan steek nie.

*  Wat kry 'n mens as jy 'n skilpad met 'n hond kruis?
'n Dier wat môre kom as jy hom vandag roep.

* Wat kry 'n mens as jy 'n slang en 'n kangaroe kruis?
'n Springtou.

*  Waar kroon die diere gewoonlik hulle koning?
Op sy kop.