Kleinkind ondersteun die Nasionale Beskermingsweek

Kinderveiligheid 

is almal se

verantwoordelikheid!!

Navrae: Kimberley Kids Consortium

082 828 2167 of 084 669 2516

Ruben gesels oor wilde diere langs die pad: Die nagapie

Liewe Maats, julle weet dat stede al groter en groter word en dat daar daagliks nuwe geboue gebou word. Hoe meer grond die mens opeis vir meer huise, winkels, fabrieke en ander geboue, hoe minder plek is daar vir diere in die natuur. Dit is die diere wat al verder teruggedryf word om plek te maak vir nuwe ontwikkeling. En in die proses van ontwikkeling word menige dier deur uitwissing in die gesig gestaar.  

Die nagapie , met 'n massa van omtrent 300 g, vind 'n tuiste in bome, en in oop woudlande, rivieroewers en bergklowe. In Suid-Afrika strek hulle verspreiding vanaf die Soutpansberge, die Krugerwildtuin tot Marico en Rustenburg.

Kenmerkend van die nagapie is sy groot ore, wollerige pels, lang stert en goed ontwikkelde agterbene. Om rats, so ver as tot vyf meter van tak tot tak te spring, is 'n besondere skerp stereoskopiese visie nodig. Daarvoor is die groot oë groot en naby mekaar geleë. Saans as daar met 'n lig op hulle geskyn word, gloei die oë helder as gevolg van 'n tapetum-lagie wat in die oog teenwoordig is. Hulle is uniek vir 'n aboreale leefwyse aangepas; vir dié doel is die duim opponeerbaar en die sole van sowel die hande en boete van kussinkies voorsien om oor 'n stewige grypvermoë te beskik. Die nagapie het die eienaardige gewoonte om in sy handpalms te urineer - moontlik hou dit die pootjies klam en klewerig om sy greep verder te verstewig.

Bedags slaap klein familie-eenhede saam in 'n nes van takkies en blare, of sommer in ou voëlneste. Saans breek die groep op om voedsel, wat hoofsaaklik uit insekte, bessies en boomgom bestaan, te bekom.

In die vroeë lente en laat somer gee die wyfie geboorte aan 'n tweeling, hoewel sy aan tot soveel as vier kleintjies, na 'n gestasie van 123 dae, geboorte kan skenk. Vir die volgende bykans 6 weke word die kleintjies gesoog aan een paar pektorale en twee paar laterale melkkliere. In die loop van 'n nag se aktiwiteite laat die wyfie haar kleintjies op verskillende takke agter om hulle weer teen slapenstyd bymekaar te maak.

Die nagapies se habitat word bedreig deur die landbou en die aanplanting van steriele plantasies. Verder word hulle voortbestaan bedreig deur die groot onwettige handel wat daar heers om hulle as troeteldiere aan te hou. Die tragiese uiteinde is dat nadat die woelige diertjies kosbare ornamente omgestamp het en op meubels geurineer het, 'n ongelukkige lot van verwaarlosing in 'n te klein hokkies hulle in die gesig staar.

Maats, 'n mens moet mooi dink oor troeteldiere - wilde diere hoort in die natuur.

[Inligting: E. Moolman, Nasionale Parkeraad, Pretoria]

Tommie: 'n Reuse dankie aan elke maat wat die GROEN STRIKKIEprojek ondersteun

Ek in lewende
lywe!!

Liewe Maats

Ek is só opgewonde, my stert kan eenvoudig nie ophou waai nie. As ek nou een van die maatjies was, het ek sommer aan die trippel gegaan, maar nou ja, ons honde kan nie trippel nie, maar ons kan bokspring en sodra ek hierdie briefie klaar geskryf het, gaan ek my vreugdespronge op die gras uitbaljaar.

Eerstens het Ouboet Ruben vir my gevra om vir julle te skryf en dis 'n heerlike pluimpie vir my, want dit beteken hy vertrou my met die administrasie. Ek sluit 'n foto van my in (as bewys) waar ek besig is om te skryf. 

Bewys van die 
koekies wat ek bak!

Julle wonder seker hoekom ek 'n voorskoot aanhet? 

Wel, ek is besig om koekies te bak vir Dutoitspan se kerkbasaar - julle weet mos ek is die een wat so graag vir ouma Annie in die kombuis gehelp het.

Tweedens wil ek al die maats van Eureka Laerskool uit die diepte van my hart bedank vir die reuse bedrag van R5 505,80. Dankie dat julle ons groen strikkie-projek so ongelooflik entoesiaties ondersteun.

Hierdie is nie net sommer 'n strikkie nie. Hierdie strikkie moet ons bewus maak dat al ons klasmaats en skoolmaats se huislike omstandighede nie so ideaal is nie. Ons moet weet dat geweld, uitbuiting en verwaarlosing ongelukkig deel is van sommige maats se lewens.

Hierdie GROEN STRIKKIE sê wat hierdie maats nie kan sê nie. Dit beteken ons moet baie meer sensitief en met oop oë deur die lewe gaan.

Dankie, Newton Laerskool dat julle nou ook deel is van hierdie wonderlike projek. Noord-Kaap, julle lyk my is sterk tweede in hierdie wedloop. 

Ek gaan op hierdie stadium my nek uitsteek, sonder om Ouboet Ruben te vra, maar ek daag die ander skole van Kimberley uit om deel te neem aan hierdie verdienstelike projek.  

Tyd raak min. Onthou, 28 Mei tot 5 Junie is Kinderbeskermingsweek!

Julle maats wat al klaar gekoop het, moet asseblief die ander outjies aanpor om ook deel te neem. Een R5 klink nie baie nie, maar honderde R5'e laat die skaal in die guns van die projek swaai.

Nou, my liewe maats, gaan ek eers 'n bietjie blaf, spring en katjie van die baan wees.

GROEN STRIKKIE-groete van 'n baie opgewonde ekke!

Tommie van Christina Kiddie Kinder- en Jeugsorgsentrum

Rosetta se goeie wense

Liefde ontstaan uit 'n gevoel van 

barmhartigheid, 

medelye, 

van waarlik omgee vir andere, 

en 'n diep begeerte om hulle gelukkig te sien.

Het jy al jou GROEN strikkie gekry??

Kinderbeskermingsweek in Suid-Afrika word vanjaar van 29 Mei tot 5 Junie 2026 gevier. Dit is ons elkeen se voorreg en reg om op te staan vir die veiligheid van ons land se kinders. 'n Skamele R5,00 kan 'n verskil maak aan die lewe van die kinders in Christina Kiddie Kinder- en Jeugsorgsentrum. 

Het jy al jou groen strikkie gekoop?

Die doel is om die bewusmaking vir kinderbeskerming te kweek, sodat geweld teen, en uitbuiting van kinders voorkom en aangespreek kan word.

Vanjaar se nasionale veldtog se tema is: 

"Werk saam om geweld teen kinders te beëindig."

Hierdie is so 'n belangrike saak en elkeen van ons moet die dag van môre se belange op die hart dra. 

Koop 'n groen strikkie en dra dit vir hierdie week by die werk of sommer net dorp toe en as iemand jou uitvra oor die groen strikkie, is dit die ideale geleentheid om oor kindermishandeling, boelie en beskerming te praat.   

Kontaknommer om van die strikkies te bekom:

053 831 2413

Moenie uitstel nie, kry sommer 

NOU jou groen strikkie!

Ns. 'n Yslike GROOT dankie aan 

elke skool en kerk en individu 

wat hierdie projek met 

soveel entoesiasme ondersteun het. 

Julle ondersteuning

en ywer gaan nie ongesiens verby nie.

Hierdie GROEN strikkie moet sê

wat kinders nie kan sê nie!

DANKIE!

Ruben-idiome: Koffie

'n Ou Ethiopiese idioom lui: een, twee, drie koppies, en dan is ons vir altyd vriende. Ek hoop, liewe maats, dat ons aan die einde van twee maande se koffie-idiome kan sê: "Ons is vriende."

* Jy is sommer op die koffie.

Betekenis: Jy praat sommer onsin.

* Sy geheue is op die koffie.

Betekenis: Hy onthou nie baie goed nie.

* Vat jy die koffie soos die kan hom skink.

Betekenis: Berus jy in jou lot. (Tevrede wees met wat jy kry)

* Hy drink die koffie van sy mamma af.

Betekenis: Hy drink sy koffie swart en bitter.

* Hy koffie maar aan.

Betekenis: Hy sukkel maar voort.

* Hy jaag sy koffie deur die vlei.

Betekenis: Hy gooi warm koffie in ’n piering, blaas daaroor om dit te laat afkoel voordat hy dit drink.

* Haar ma se koffie smaak nie meer lekker nie.

Betekenis: Gesê van 'n kêrel wat nie meer by die meisie wil gaan kuier nie.

Portia's Monday Blessing

Elke kind verdien dit om veilig en geliefd te voel

Kinderbeskermingsweek in Suid-Afrika word vanjaar van 29 Mei tot 5 Junie 2026 gevier. Dit val onder die breër, maandlange viering van Kinderbeskermingsmaand. 

Die doel is om die bewusmaking vir kinderbeskerming te kweek, sodat geweld teen, en uitbuiting van kinders voorkom en aangespreek kan word.

Vanjaar se nasionale veldtog se tema is: 

"Werk saam om geweld teen kinders te beëindig."

Hierdie is so 'n belangrike saak en elkeen van ons moet die dag van môre se belange op die hart dra. 

Koop 'n groen strikkie en dra dit vir hierdie week by die werk of sommer net dorp toe en as iemand jou uitvra oor die groen strikkie, is dit die ideale geleentheid om oor kindermishandeling, boelie en beskerming te praat.   

Kontaknommer om van die strikkies te bekom:

053 831 2413

Moenie uitstel nie, kry sommer 

NOU 

jou groen strikkie!

Ns. 'n Yslike dankie aan elke skool en kerk wat

hierdie projek met soveel entoesiasme

ondersteun het. Julle ondersteuning

en ywer gaan nie ongesiens verby nie.

DANKIE!

Market for Charity: Die oplossing vir jou pa se geskenk - sien jou daar!

Waar?

McGregor Museum

Atlasstraat, Herlear, Kimberley, 8301

Wanneer?

6 Junie 2026
09:00-14:00

Wat?

'n Liefdadigheidsmark

Fondse gaan vir Christina Kiddie Kinder- en Jeugsorgsentrum.

Onthou: Vadersdag is 21 Junie 2026

Spesiale en baie mooi geskenke vir manlief, 

pa en oupa.

Navrae: 084 395 7297

Ruben-humor: Raaisels uit die Bybel

Ouma Annie vertel dat hulle selfs raaisels uit die Bybel gehad het.

* Raaisel 1:

Hoe lank was Petrus?

Tot hy skoon is.

* Raaisel 2:
Hoeveel diere het Moses is die ark geneem?

Noag was in die ark en nie Moses nie.

* Raaisel 3:
Wie het nooit sy huis verlaat nie?

Kajafas, die hoëpriester.

* Raaisel 4:
Wie was die eerste man in die Bybel wat geskeer het?

Kaleb. (Of was dit nou Kaallip?)

Dankie vir die verskil wat Helpende Hand maak

Dankie, Helpende Hand dat julle met jul Helpjag-projek, altyd  vir Christina Kiddie Kinder- en Jeugsorgsentrum onthou.

Julle gesindheid, uitreik en vrygewigheid maak van die wêreld 'n beter plek. 

Dankie dat julle hartspore los. Hartspore sit 'n glimlag op die ontvangers se gesig en gee vlerke aan die woord HOOP.

Ruben se een minuut gedig: Slaap

Maats, hierdie gedig plaas ek op versoek van my ouma Annie. 

(Sy het dit jare terug op skool geleer en sy het dit ook vir ons as klein hondjies geleer. Lees dit sommer drie keer deur.) 

Wat is die slaap ‘n wondersoete ding!
Sag op haar bloue oë daal die vaak
soos maneskyn diep waterkuile raak
om daar te droom in silwer skemering.

Vir laas beef oor haar lippe ‘n fluistering:
“Nag, Pappie.” Ek merk hoe langsaam hy genaak,
wat drome soet tot werklikhede maak:
in vaderarms rus my lieweling.
Sluit so my oë, God, wanneer vir my
u Engel wenk ter laaste, lange rus
en ek van wilde woeling hier moet skei;
dat my dan stille drome huis toe sus
en sterke Hand deur duisternisse lei.
Sluit so my oë, God, as ek gaan rus.

* DF Malherbe (1881-1969)

[Klik HIER]

Rosetta se goeie wense

Vriendelikheid kos so min, 

en is tog so kragtig 

dat dit mense se woede kan stil, 

hul pyn kan versag, 

en hul help om hulself as waardevolle kinders 

van 'n Hemelse Vader te sien.

Ruben-idiome: Koffie

Ilse Zietsman skryf in haar blog: 'n Ethiopiese legende lui dat ‘n bokwagter genaamd Kaldi eeue gelede koffie ontdek het. Of om meer spesifiek te wees - Kaldi se bokke het die koffiebone ontdek. Kaldi het opgelet dat sy bokke ekstra woema gehad het na hulle helderrooi bessies van 'n sekere boom geëet het.

Kaldi het vir die ab van die plaaslike klooster (abdy) hiervan vertel. Die ab het dieselfde bessies gebruik om 'n drankie voor te berei en toe agtergekom dat hy vir langer kon bid ná hy dit gedrink het. Van hier het die woord versprei tot waar koffie vandag een van die gewildste drankies ter wêreld is.

'n Ou Ethiopiese idioom lui: Een, twee, drie koppies, en dan is ons vir altyd vriende.

* By haar is sy koffie bitter.

Betekenis: Sy hou nie baie van hom nie.

* Hulle is lief vir koffie drink.

Betekenis: Hulle skinder graag.

* Hy is so skelm, hy sal die melk uit jou koffie steel.

Betekenis: Hy is uiters geslepe.

* Haar koffie vlek die koppie.

Betekenis: Sy maak haar koffie baie sterk.

* Hy het êrens 'n trekseltjie koffie gaan vra.

Betekenis: Hy gaan kuier iewers by 'n nooi.

* Hy sal nog sy koffie kry.

Betekenis: Daar sal nog met hom afgereken word.

Portia's Monday Blessing

Ruben-humor: Ouma se raaisels

Liewe Maats, dis nie net ouma Annie wat opgewonde is oor die raaisels nie, maar ook julle maats. Dankie vir al die raaisels wat julle vir my aangestuur het, ek sal dit so deur die loop van die jaar gebruik. Ek het selfs al raaiselhuiswerk moes doen. Onderwysers gee vir die kinders raaiselhuiswerk en die outjies wat nie meer oupas en oumas het nie, stuur vir my 'n e-pos of 'n WA en dan moet ek vinnig dink. Ek kan, as ek vasbrand, gelukkig die lyne na Petrusburg slaan en ouma is altyd reg met 'n antwoord. Dankie, ouma Annie.

Raaisel 1:

* Wat kan erdvarke kry wat geen ander dier op aarde kan kry nie?

Antwoord: Baba-erdvarkies

Raaisel 2:

* Wat het die krimpvarkie die kaktus gevra? 

Antwoord: “Is jy my mamma?”

Raaisel 3:

* Raai watter drie woorde gebruik ons die meeste? 

Antwoord: "Ek weet nie"

Raaisel 4:
” Maak my dood dan leef ek langer
Laat my leef dan dood ek gouer”

Antwoord: 'n kers

Hemelvaartdag: 'n Dankie-Donderdag in vele opsigte

Hemelvaartdiens: Deurkollekte - Christina Kiddie

Deel van KJSS-personeel

God se voorsiening en Laerskool Eureka se omgee-harte 

op Hemelvaartdag

tasbaar in 'n kollektebordjie! 

Dit bring hoop, skep geleenthede en help bou aan 'n beter toekoms!

'n Yslike groot dankie aan dr. Etienne Venter, personeel en elke 

Eureka-leerder  en -ouer dat julle OMGEE

in dade omsit.

Ruben se een minuut storie: Tebo en sy besondere hond

Foto van my in die 
studeerkamer en 'n skets
van Arthur.

Ek het nou die dag vir Tebo in die straat raakgeloop en ons het 'n heerlike gesprek oor honde gehad. Ek plaas vir julle 'n gedeelte van die gesprek. Tebo is heelwat jonger as ek, en daarom het ek sommer 'n paar onlogiese vrae tussenin gegooi.

Ek: "Tebo, ek sien jy loop die laaste paar dae gereeld hier voor die skool verby met 'n hond aan 'n leiband. Watter soort hond is dit?"

Tebo: "Dis 'n opregte bloedhond."

Ek: "Waar het jy hierdie besondere hond gekry?"

Tebo: "By my oom. Dit is 'n baie nuttige soort hond. Die polisie hier in Kimberley het hom gebruik om diewe en kwaaddoeners op te spoor."

Ek: "En hoe het jy so 'n gesogte hond in die hande gekry?"

Tebo: "My oom is die man wat met die bloedhonde werk. Hierdie hond het seergekry en nou kan hy nie meer daardie soort werk doen nie. Dit verg intensie konsentrasie en hy moet die hele tyd gefokus bly."

Ek: "Dit is 'n baie mooi hond en hy lyk vir my sommer na 'n baie slim hond. Ek het ook so 'n slim vriend wat op 'n plaas bly. Maar dit is 'n skaaphond."    

Tebo: "Watter soort werk kan 'n skaaphond op die plaas doen?"

Ek: "Wel, hy word ingespan om met skape te werk. Wanneer die skape in die veld gaan haal moet word, jaag hy die skape aan. Hulle is bang vir hom en hardloop nie weg van die trop af nie. Hy weet presies wat om te doen. Hy is so fiks en fluks dat hy amper drie mense se werk gelyk kan doen. 

Tebo: "Ek het my hond nou twee maande en hy is lief vir my. Hy tjank soggens wanneer ek skool toe gaan. Hy is 'n baie goeie waghond. Snags pas hy die huis op. Hy knor en blaf wanneer hy iemand sien, maar hy byt darem nie. Hy baklei ook nie met ander honde nie. Hy hou daarvan om te stap en dit is hoekom jy my elke middag met Arthur aan die leiband sien. 

Ek: "Geniet jou hond en stuur asseblief vir my 'n foto. Ek is seker die maats wil graag weet hoe lyk 'n bloedhond." 

Never forget how strong you are ...

You did it while you were exhausted.
You did it while you were overwhelmed.

You did it while you were sick.
You did it while you were heartbroken.
You did it while you were running on empty.
You did it on days you wanted to give up.
And somehow, you are still showing up,
still giving your best,
still being an incredible person.

Never forget how strong you are.

Statistiek: 166 000 e-besoeke van gewaardeerde e-lesers