Rosetta se Woensdag-wense

Mag die pad nooit vir jou te steil word nie, 

mag die sonskyn jou aangesig koester, 

mag die reën saggies op jou velde daal. 

Mag God jou in Sy holte van Sy hand hou:

vandag, môre en altyd.

Ruben-idiome: Honde

Vandag is die tweede sarsie idiome. Ek hoop julle onthou nog verlede week s'n. Geniet dit! 

* So siek soos ‘n hond wees.

Betekenis: Baie siek wees.

* Soos kat en hond lewe.

Betekenis: In onenigheid lewe, voortdurend rusie maak (veral van 'n man en 'n vrou gesê).

* Twee honde veg om een been, die derde loop daarmee heen.

Betekenis: Twee mense of partye twis oor iets en 'n derde trek die voordeel daaruit.

* Vir die kat kwaad wees en die hond skop.

Betekenis: Jou op ‘n onskuldige persoon wreek as jy kwaad is.

* Wors in ‘n hondehok soek.

Betekenis: Iets soek waar jy dit nie sal kry nie.

Portia's Monday Blessing

Ruben se een minuut storie: Optel se nuwe huis

Optel was 'n bitter klein ou skilpadjie toe hy en sy boetie vir 'n naweek by hul ouma gaan kuier het. Hulle was baie opgewonde, want hulle weet dat ouma nie so streng soos mamma is nie. Ouma vat gewoonlik 'n middagslapie en dan kan hulle twee lekker rondloop.

Hulle het deur die veld geloop en omdat dit afdraand na die spoorlyn se kant is, het dit baie vinniger gegaan as wat hulle verwag het. So halfpad in hulle rondlopery, besef Optel dat as hulle teruggaan na hulle ouma toe, sal hulle opdraand moet loop en dit gaan baie baie langer vat. Hy steek onmiddellik in sy vier spore vas en draai sy kop stadig na agter. Dis belangrik om te weet hoe ver hulle moet terugloop. Toe hy die afstand sien, skrik hy sy kop terug in sy dop. Sy boetie is haastig op pad en kom nie eens agter dat sy broer nie meer aan sy sy is nie.

Optel probeer sy broer se aandag trek - hy roep en roep, maar die trein wat op daardie oomblik teen 'n verbysterende spoed by hulle twee verbysnel, doof die kommerwekkende roep van Optel uit. Optel besluit om om te draai. Met of sonder sy boetie. Ten minste weet hy waar sy broer hom bevind en kan hy sy ouma oortuig om saam met hom te loop om sy avontuurlustige broer te kry.

Hy was nog nie op spoed nie, toe hy voel hoe 'n kragtige hand hom optel. Sonder om te kyk, trek hy hom terug in sy dop en met 'n kloppende hart luister hy of hy enige iets kan uitmaak. So uit die hoek van sy oog, sien hy sy boetie in die man se ander hand. Ten minste is hulle twee saam in die gemors. Hy wonder of sy ouma al wakker is. Hy wonder ook of sy na hulle soek en sal sy weet watter kant om te loop. Hy is so spyt dat hy maar nie net rondom die pappot gevroetel het nie. En hy wonder ook of dit sal help om te bid as jy deur jou eie toedoen in die moeilikheid beland het.

Hulle twee beland in 'n donker sak en hulle weet moeilikheid is hulle voorland. Wat hulle nie weet nie, is dat hulle twee op die swartmark verkoop gaan word. Tussen 'n magdom mense en groot lawaai, kom daar 'n lang bebaarde man na hulle aangestap. 

Onderhandelinge vind plaas en die man van die sak, oorhandig hulle twee aan hul nuwe eienaar. Hulle voel 'n bietjie meer gerus, maar besef dat hulle lewe vir altyd verander het. Hoe op aarde gaan hulle weer hulle ouma kry en wat gaan hulle ma sê.

Hulle weldoener sit hulle op 'n lowergroen grasperk neer. Maar o wee, hy het 'n yslike hond wat baie belangstel in hulle twee. Sy boetie wil nog weghardloop, maar sy voet haak vas en die hond kry hom in 'n stewige greep beet. Gelukkig hou hy kop en hy byt die hond 'n geniepsige byt aan die onderlip. Hond se kind laat val sy broer, maar hy het seergekry. Hulle moet maak dat hulle hier wegkom, terwyl Hond nog in pyn verkeer.

Twee huise verder kom hulle af op 'n pragtige tuin, met feetjieliggies, 'n voëltjiebad en hope heerlike groen plante waaraan hulle na hartelus kan kou. Daar is ook 'n hond in dié erf, maar jy kan aan haar houding sien dat sy 'n baie statige ou dame is. Sy jaag nie voëls nie en kyk katte uit die hoogte uit aan. Hulle weet nie presies wat haar doel is nie, maar hulle voel ten minste nie bedreig nie.

Arme boetie, met 'n stukkende dop en harsingskudding van die val, het hy net al swakker en swakker geword, totdat hy sy laaste asem snikkend uitgeblaas het. Sy laaste woorde aan my was dat ons nie só ongehoorsaam moes gewees het nie.

Nou is ek alleen. 

Stoksielskilpadalleen.

Gelukkig het ek al maats gemaak met die statige dame van die erf, en die vriendelike vrolike dame van die huis. Hulle het altwee het gesê ek is meer as welkom om saam met hulle daar te bly. Tot tyd en wyl ek nie ander planne bedink het nie, gaan ek eers van hulle gasvryheid gebruik maak. 

Tot weersiens!

Wat het ek uit hierdie storie geleer:

* Moenie by jou ouma gaan kuier met ander planne in jou kop nie.

* Moenie jou ouma se goedheid misbruik nie. Dink net hoeveel stres en kommernisse laai jy op jou

   ouma se skouers. Alles onnodig.
* Moenie ongehoorsaam wees nie, want niemand hou van 'n ongehoorsame skilpad nie.
* Moenie oop en bloot rondloop dat almal jou kan raaksien nie. Sluip van bossie tot bossie vir jou eie 

   skilpadveiligheid.
* Nie alle mense is vriendelik nie en beslis is alle honde ook nie vriendelik nie.

Rosetta se Woensdag-wense

Mag die toekoms vir jou mooi wees en jy mooi vir die toekoms. 

Hou jou oë gevestig op God en dit sal altyd met jou goed gaan. 

Sterkte en seën vir 2026!

Ruben-idiome: Honde

Kyk, Maats, ek is lief vir stories, grappies, idiome en Afrikaans. Elke Donderdag deel ek met julle 'n storie waarvan die inhoud my op een of ander manier geraak het. En terwyl ek so sit en lees, dink ek daaraan dat julle nie meer idiome gebruik nie. Idiome raak skaars. Idiome is die blink juwele in 'n gesprek - die stukkie sin wat jou tone laat omkrul van die lekkerte, want 'n mens kan die prentjies in jou kop sien. 

Daarom het ek besluit om een maal 'n week na idiome te kyk en met julle te deel. Vandag begin ek met die letter H. En dit is nie om dowe neute nie. Elkeen van die volgende paar weke se idiome gaan die woord HOND inhê. Ek wil kyk hoeveel van hierdie idiome julle kan memoriseer. Geniet dit! 

* Agter elke hond aan blaf.

Betekenis: Ander napraat sonder om 'n eie mening te hê.

* As 'n mens 'n hond wil slaan, kry jy maklik 'n stok.

Betekenis: 'n Mens kan altyd 'n rede kry om ander kwaad aan te doen.

* Baie honde is ‘n haas se dood. 

Betekenis: Deur samewerking word veel uitgerig.

* Bekend soos die bont hond.

Betekenis: Alom berug.

* Blaf met die honde en huil met die wolwe.

Betekenis: Met persone van verskillende menings saampraat/met almal saampraat.

Portia's Monday Blessing

Ruben-humor: Raaisels

* Wat is rooi, stroopsoet en gevaarlik? 

Aarbei-en-skerpioenkonfyt

* Wat is die definisie van 'n pou?

'n Hoenderhaan wat blom.

* Waarom het Noag die ark gebou?

Hy wou oorsee gaan.

* Wat word 'n optimis met ondervinding genoem?

'n Pessimis

Oujaarsdag se koekiebedrywighede

Gelukkige 2026

Mag jy die perspektief en die uitdagings vind wat jy soek in 2026. 

Soos ‘n baie slim persoon eendag gesê het: “Die lewe gaan nie daaroor om te wag totdat die storm en al jou probleme verby is nie, dit gaan daaroor om te leer dans en lag in die reën.” 

Dit is die perfekte tyd om ‘n nuwe bladsy om te blaai en jou drome te volg. Jy kan dit doen! Glo in jouself. 

Jy is 2026 se wenmateriaal!

Vakansie-idees: Probeer dit!

* Leer om 'n analoog-horlosie te lees.

* Doen vrywillige werk by die DBV of 'n diereskuiling.

* Leer 'n paar kaarttruuks aan en vermaak jou maats as julle verveeld is. Los 'n slag die selfone uit.

* Leer om die blombeddings te bemes en potplante uit te plant. Jy het dalk groenvingers en jy weet dit nie eens nie.

* Vra vir Tannie Mittah om jou te leer konfyt kook. Jy kan nie vir 'n beter leermeester vra nie.

Ruben-humor: Lawwe definisies

* Wat is die definisie van rolskaatse?
Dit is tekkies sonder remme.

* Wat is die definisie van 'n kat?
Iets wat aanmekaar in ander mense se erwe en lewens is, in plaas van in sy eienaar s'n.

* Wat is die definisie van 'n hond?
Iets wat snags verskriklik blaf en hopies probleme skep.

Statistiek: 119 000 e-besoeke van lojale e-lesers

Portia's Friday advice

Kerswense 2025

'n Kersfeesboodskap

Mnr. G. Grobler van Laerskool Koedoeskop: "Ek het die volgende boodskap ontvang van iemand spesiaal, dalk bring dit ‘n boodskap tuis vanjaar. Matt 9:13 “Ek het nie gekom om mense te roep wat op die regte pad is nie, maar die sondaars”

Kersfees is ‘n tydperk van besluite - waar gaan ons wees, wat gaan ons eet en wie gaan wat kry? Jingle Bells en Stille Nag se klanke oor winkelsentrums se klanksisteme in jou ore dui die frustrasie van nog ‘n jaar se Kersfeesverkope aan. Jy en mamma het al ‘n geveg voor die eerste geskenk gekoop is. Indien dit die geval is, lees die volgende verhaal en gee dit vir iemand voor dit te laat is."

Waarheen is jou skip van drome op pad?
Sy het bekend gestaan as die skip van drome. Sy was agthonderd en negentig voet lank. Veertienduisend mense het aan haar gebou. Die anker het vyftien en ‘n half ton geweeg en is deur twintig perde van die fabriek af tot by die skip getrek. Die binnekant van hierdie skip het tien maande geneem om te voltooi, altesaam ‘n paar miljoen ure se werk aan Louis Quinze Klassieke Versailles en Victoriaanse versierings, Crown Berger skilderye, Franse kafees en Turkse baddens om maar net ‘n paar te noem.

Sy is ook genoem: Die onsinkbare skip en in ‘n koerant van 1912 word berig dat selfs God haar nie kan sink nie.

Maar op Sondagaand 12 April 1912 sink die Titanic binne twee ure en neem 1500 lewens saam na haar watergraf.

Tydens hierdie twee ure het interessante verhale afgespeel. Daar was te min reddingsbote. Die rykes en vernames het gesorg dat hulle eerste plek kry. Later het die kaptein oor sy megafoon afgekondig dat net vrouens met babatjies plek op die reddingsbote mag kry. ‘n Man met ‘n babatjie in sy arms het verby ‘n vrou gehardloop wat nie ‘n kind gehad het nie. Vir haar was die afkondiging ‘n doodsvonnis. Skielik het haar situasie verander toe die man sy kind in haar arms sit en sê: Dit is joune ... hardloop vir jou plek op die reddingsboot!

Wat is jou grootste Kersgeskenk?

Ons is almal daarvan bewus dat ons lewensvaart iewers soos die Titanic gaan sink. Ons is ook bewus daarvan dat nie almal in hierdie lewe die reddingsboot van Jesus gaan haal nie.

Met Kersfees kom sit God opnuut weer sy kind in jou arms en sê: Dit is joune ... hardloop na my reddingsboot. Moenie wag tot dit te laat is nie. Wanneer ‘n skip sink, word lug uitgeblaas en water ingesuig. Wag jy tot dit te laat is, word jy saam ingesuig, al spring jy. Die meeste mense wat hulle lewe in die Titanic ramp verloor het, het nie verdrink nie maar verkluim. Wie wil in koue water ronddobber as Jesus reeds vir jou ‘n plek op sy onsinkbare reddingsboot voorberei het.

Miskien is daar iemand waaroor jy baie bekommerd is of wonder waar hulle welvaart hulle aan die einde van nog ‘n jaar bring. Miskien sukkel jy ook soos ek om geskenke te koop en wonder wát jy vir daardie een sal koop die jaar. Gee dan bogenoemde Kersfees-reddingsverhaal vir daardie persone as ‘n geskenk. Sit Jesus in die arms van mense wat oop oë besig is om te sink. Dit is tog al waaroor Kersfees gaan, dit mag dalk daardie persoon se grootste geskenk wees in sy lewe.

Sonder Jesus is ‘n vyftien ton anker te lig. My wense vir almal is: dat julle reeds plekke het op God se reddingsboot.

[Kwêvoël - December 17, 2010]

Dinsdaggedagtes van Katelyn Marais

Die waarde van 'n drukkie

Het jy al ooit gewonder ... wat in 'n hartlike drukkie opgesluit is? Is dit bloot 'n gebruiklike groet, 'n bond van vertroosting of 'n gebaar om te wys dat ons omgee? Watter betekenis dra die vlugtige drukkie? Wel, dit blyk dat ouers se drukkies vir hul kinders groot gewig dra. 

In die Skrif sien ons die diepgaande uitwerking van 'n vader se omhelsing in die gelykenis van die verlore seun (Luk. 15). 'n Eenvoudige drukkie was instrumenteel om die innerlike konflik van die eiesinnige seun tot bedaring te bring en het gedien as 'n tasbare versekering van sy pa se onwrikbare liefde.

As jy 'n ouer is, en dit spreek tot jou, knyp vandag 'n tydjie af om jou kind 'n stywe drukkie te gee. Ons kinders het nie nog 'n lesing of 'n streng berisping nodig nie, wat hulle nodig het, is om die Evangelie van genade te ervaar.

[Bron: JUIG! Tydskrif: Mei 2024]

Vakansie-idees: Probeer dit!

* Wees gaaf met die kelner wat jou bedien.

* Gee jou brakkiesakkie van die restaurant vir 'n hawelose persoon. (Jy het te veel kos geniet en hy sit en wag vir iets om die hongerpyne te stil - plaas jou in sy posisie!)   

* Elke keer as jy nuwe klere kry, gee van jou ou kledingstukke weg.

* Groet jou bure vriendelik as jy hulle in die straat sien. 

* Glimlag sommer vir iemand wat verby jou loop. (Baie gou raak hierdie 'n gewoonte wat nie net vir jou beter laat voel nie, maar ook die persoon wat die opregte glimlag gekry het.)

* Samel toiletware en ander noodsaaklikhede in vir 'n skuiling vir haweloses.

*  Sê gereeld dankie as iemand jou help.

Dankie vir AL bogenoemde voorstelle. Julle outjies kook as dit by idees kom. Sommige voorstelle is regtig van lesers met 'n hart vir uitreik. Uitreiking het gewoonlik verrykende gevolge en ons sal dit graag hier met ander wil deel!

Ruben deel sy vriendin Talana se brief

Liewe Maats

Vandag gaan ek met 'n ander een se kalwers ploeg. Ek kan dit egter nie beter stel nie en ek glo dat liewe Talana nie sal omgee as ek haar brief met julle gaan deel nie. Sy het die tienerrubriek in die KEUR hanteer in 1994 - julle is reg - dit voel soos eeue terug. Nietemin, lees asseblief haar brief en laat weet my wat julle daarvan dink.

Dus kry julle vandag 'n brief binne 'n brief.

Liewe Tieners

Wel, waar ons die pylvak van nog 'n jaar binnegaan, wil ek vir julle vra dat julle my groete vir die Kerstyd en die hartlikste wense vir 'n aangename, geseënde en voorspoedige nuwe jaar aan julle ouers sal oordra ... en natuurlik ook vir julself elkeen 'n groot skep goeie wense neem. Julle is immers die belangrikste rede hoekom hierdie rubriek bestaan.

Julle sien, al lyk dit nie elke dag so nie en al voel julle soms bedruk en hartseer en onvoldoende toegerus vir al die eise wat aan julle gestel word, bly julle nog steeds die hoop vir ons land se toekoms.

Ons is oud, uitgedien en het ons beurt gehad, goed of sleg. Dis verby. Maar julle, wat nog jonk is en vir wie die wêreld wyd en oop lê, kan die toekoms maak of breek.

Jy kan bou of afbreek. Jy kan glo of ongeloof laat hoogty vier. Jy kan verbeter of versleg. Jy kan groei of stagneer.

Niemand kan jou máák bou, glo, verbeter of groei as mens en persoon as jy nie sélf wil nie. Jy sit met die magtigste wapen in jou tienerhande: dat jy jou eie toekoms en jou eie lewe kan beheer.

Die boustene is daar wat jy moet benut: geloof, opvoeding, norme en waardes, tradisie en kultuur. Wat jy daarmee gaan doen in die nuwe jaar, weet net jyself. Ek glo voluit in julle as tieners en in jul potensiaal.

Jy hoef nie berge te versit of brûe te bou in een dag nie, maar 'n klein, klein klippie van geloof, liefde, aanvaarding, selfrespek,  trots en vasberadenheid elke dag kan aan die einde van volgende jaar 'n stewige muur gevestig hê waarop jy dag na dag, jaar na jaar kan voortbou in geloof in die toekoms. Dit kan jou beskut, jou anker, en aan jou 'n vastrapplek gee om te waag in die lewe.

Die grootste dam het begin met een druppel water. Die hoogste boom het begin as 'n nietige saadjie. Die rykste mens moes iewers die eerste keer 'n enkele sent in sy hand gehou het. Die beste spreker in die belangrikste parlement het ook op 'n tyd probeer ba-ba-ba sê en dit reggekry.

Die geheim is dat jy daardie eerste woord, eerste tree, eerste aksie sal probeer, en dit regkry. Dis maklik. Dan moet jy daarop voortbou. Tree vir tree, woord vir woord, sent vir sent en druppel vir druppel, tot jy kom waar jy wil wees. probeer dit. Voordat jy jou kom kry, is jy magtig, ryk en beroemd, deur die filosofie van one step at a time.

Die tweede geheim is dat jy nooit jou oorsprong sal vergeet nie. Al is jy eendag hoe ryk, hoe magtig, hoe beroemd, sou jy niks gewees het, sonder daardie een enkele tree, daardie sukkelende woord, daardie nietige geldstukkie nie. Wanneer jy op die toppunt is, kan jy ander se hande vat en hulle help op daardie eerste tree, met daardie eerste woord en aan daardie eerste sent. Want hierdeur kan 'n mens ryk, magtig en beroemd bly én gelukkig wees in alles wat jy doen. 'n Mens koop nie geluk nie. Jy skep dit vir andere en dit reflekteer duisendvoudig keer na jouself ...

Probeer dit. 

Maats, hier is soveel goeie wenke en gedagtes vir 'n blink toekoms, dat ek julle graag wil uitdaag om dit ter harte te neem. Skryf een gedagte voor in jou huiswerkboek en werk die nuwe jaar daaraan, sodat 2026 'n onthoujaar vir jou sal word.

Hartlike groete uit Kimberley tot 'n volgende keer!

Ruben

[Bron:  Kom ons gesels met Talana KEUR 14 Januarie 1994]